Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 233 Hüküm no: 236 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın, kardeşi Mehmed b. Abdullah’ın zimmetini ibrâ etmesi Havâss-ı Aliyye kazâsı tevâbi‘inden Hasköy’ünde sâkine Fâtıma bt. Abdullah nâm hâtun mahfil-i şer‘de li ebeveyn karındaşı râfi‘ü’l-kitâb Mehmed b. Abdullah nâm mühtedî mahzarında ikrâr ve takrîr-i kelâm edip beynimizde ma‘lûm menzil kirâsından ba‘de külli hesâb karındaşım mezbûr Mehmed zimmetinde sekiz bin akçe hakkım olup bundan akdem meblağ-ı mezbûr karındaşım mezbûrdan taleb ve huzûr-ı hâkimde da‘vâ eylediğimde ikrâr etmeğin alâ mûcebi ikrârihî edâ ile ilzâm olmuşidi el-hâletü hâzihî biz şeref-i İslâm ile müşerref olmazdan mukaddem hâlik olan babamız İlyazer nâm yahudi evkāfından olup on altı bin akçe mu‘accele ve yevmî on iki akçe müeccele ile mütevellî-i vakf-ı mezbûr olan gāib ani’l-meclis Mehmed Bey bana ber mûceb-i şart-ı vâkıf îcâr eylediği ma‘lûmü’l-hudûd menzilin icâresinden karındaşım mezbûr Mehmed’in hissesine isâbet eden sekiz bin akçeyi zimmetinde bana edâya lâzım gelen sekiz bin akçeye takās ben dahi mukāssa ve kabûl edip zikr olunan sekiz bin akçeye müte‘allik da‘vâdan mezbûr Mehmed’in zimmetini ibrâ ve iskāt eyledim min ba‘d meblağ-ı mezbûra müte‘allik da‘vâ ve nizâ‘ım kalmadı deyicek gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şevvâli’l-mükerrem li sene isneyn ve seb‘în ve elf. Şuhûdü’l-hâl: Hamza Efendi nâib-i recül, çukadâr Mehmed Beşe, çukadâr -ı sânî Ali Beşe, Ahmed b. Hasan.