Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 234 Hüküm no: 237 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo v. Angeli’nin evini Davutpaşa Bahçesi Bostancıları Vakfı’na istiğlâl yoluyla satması Havâss-ı Aliyye kazâsına tâbi‘ Litroz nâm karye sükkânından Yorgo v. Angeli nâm zimmî meclis-i şer‘-i hatîr-i lâzımü’t-tevkīrde hadâik-i sultâniyyeden Davudpaşa hadîkası bostânîlerinin ta‘âmiyyesi için Ebûbekir nâm sâhibü’l-hayrın vakf eylediği nukūda meşrûtiyyet üzre bi’l-fi‘l mütevellî olan hadîka-i mezbûre üstâdı râfi‘ü’l-kitâb el-Hâc Ömer Ağa b. Mustafa tarafından ikrâr-ı câ’i’z-zikri tasdîke vekîl olup vekâleti Ali Beşe b. Halil ve Mustafa Beşe b. Sâlih şehâdetleri ile şer‘an vekâleti sâbite olan fahrü’l-eimme Mustafa Efendi b. Mehmed mahzarında bi tav‘ihî ikrâr ve takrîr-i kelâm edip emlâkimden olup karye-i mezbûrede vâki‘ bir tarafdan Hristodoli mülkü ve üç tarafdan tarîk-i âm ile mahdûd iki kepenek bir kıt‘a bakkal dükkânı ve kurbunda bir bâb ahırı müştemil, cümle tevâbi‘ ve levâhıkı ile târih-i kitâb senesinin Recebü’l-müreccebi gurresinden müvekkil-i mezbûr Ömer Ağa’ya her bir guruşu yedişer dirhem olmak üzre cem‘an yüz kıt‘a riyâlî kebîr guruşa bi tarîki’l-istiğlâl bey‘ ve teslîm, ol dahi mâl-ı vakf-ı mezbûr ile tarîk-i mersûm üzre târih-i mezbûrda iştirâ ve tesellüm ve kabz ve kabûl edip semen-i mezbûrü’n-na‘t yüz kıt‘a riyâlî kebîr guruşu müvekkil-i mûmâ-ileyh el-Hâc Ömer Ağa yedinden tamamen alıp kabz eylediğimizden sonra yine dükkân-ı mezbûru ba‘de’t-tahliyyeti’ş-şer‘iyye târih-i kitâb senesi Recebü’l-müreccebi gurresinden bir sene tamâmına değin bin beş yüz akçe ücret ile bana îcâr ve tesellüm, ben dahi vech-i meşrûh üzre istîcâr ve tesellüm ve kabz ve kabûl eyledim deyicek mukırr-ı mezbûrun minvâl-i mübeyyen üzre cereyân eden ikrârını vekîl-i mezbûr Mustafa Efendi bi’l-vekâle vicâhen tasdîk ve tahkīk etmeğin mâ hüve’l-vâki‘ kayd şüd. Fi’l-yevmi’t-tâsi‘ aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Ali Bey b. Halil, Mustafa Bey b. Sâlih Ser-bölük, İbrahim Halîfe b. Mustafa ve gayruhüm mine’l-hâzırîn.