Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 235 Hüküm no: 238 Orijinal metin no: [51b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Dede b. Hasan’ın evini Ali Beşe b. Süleyman’a satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Baba Haydar-ı Nakşibendî mahallesinde sâkin Ali Dede b. Hasan meclis-i şer‘de râfi‘ü’l-kitâb diğer Ali Beşe b. Süleyman nâm recül mahzarında ikrâr ve takrîr-i kelâm edip bundan akdem silk-i mülk-i sahîhimde münselik olan emlâkimden mahalle-i mezbûrede vâki‘ iki tarafdan tarîk-i âm ve bir tarafdan Hamza Ağa odaları ve bir tarafdan mekābir-i müslimîn ile mahdûd iki fevkānî ve iki tahtânî odaları ve su kuyusu ve hadîka-i zât-ı eşcâr-ı müsmire ve gayr-ı müsmire ve havlu ve kenîfi müştemil mülk menzilimin bir bâb fevkānî oda ve müşterek su kuyusundan mâ‘adâsını âhara bey‘ ve teslîm etmişidim el-hâletü hâzihî bâkī kalan mârrü’z-zikr bir bâb fevkānî odayı ki mekābir-i müslimîn tarafındandır havlusu ve Meryem Hâtun ile müşterek su kuyusu ve sâir tevâbi‘ ve levâhıkı ve sokak kapısıyla mezbûr Ali Beşe’ye iki bin beş yüz fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t iki bin beş yüz akçeyi tamamen mezbûr Ali Beşe yedinden alıp kabz eyledim ba‘de’l-yevm menzil-i mezbûrda benim alâkam yokdur. Müşterî-i mezbûr Ali Beşe’nin mülk-i müşterâsıdır, keyfe mâ yeşâ’ mutasarrıf olsun dedikde mâ hüve’l-vâki‘ kayd şüd. Fi’l-yevmi’s-sâlis ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Ahmed b. Emrullah, Hasan b. Abdullah el-Dellâl, Mehmed b. Mahmud, Şaban Beşe b. Mahmud, Dilâver b. Abdullah ve gayruhüm mine’l-hâzırîn.