Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 237 Hüküm no: 240 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye bt. Mahmud’un vakıf menzil davasının reddi Mahmiye-i İstanbul’da Şehzadebaşı’nda sâkine Râziye bt. Mahmud nâm hâtun meclis-i şer‘de zikri âtî vakıf menzilde sâkin olan hâmilü’l-kitâb es-Seyyid Mahmud b. es-Seyyid Mehmed nâm kimesne mahzarında üzerine takrîr-i da‘vâ edip bundan akdem fevt olan vâlidem Âdile nâm hâtunun mu‘takası Mâhî Hâtun nâm sâhibetü’l-hayr hâl-i hayâtında silk-i mülk-i sahîhinde münselik olan emlâkinden medîne-i Hazret-i Ebâ Eyyûb el-Ensârî’de Bıçakçıbaşı mahallesinde vâki‘ inde’l-ahâlî ve’l-cîrân ma‘lûmetü’l-hudûd mecmû‘ mülk menzilini bin yirmi üç senesi şehri Rebî‘ulevveli evâhirinde vakf-ı lâzım ile vakf ve haps edip süknâsını evvelâ kendi nefsine, ba‘dehâ zevci Perviz Reis’e, ba‘dehû zevc-i mezbûrun sulbî oğlu Mehmed’e, ba‘dehû mezbûr Mehmed’in evlâdına ve evlâd-ı evlâdına ve evlâd-ı evlâd-ı evlâdına ve evlâd-ı evlâd-ı evlâd-ı evlâdına ba‘de’l-inkırâz bir odasını müdebberesi Kâmuran bt. Abdullah’a ve evlâdına ve evlâd-ı evlâdına ve bir odasını âhar müdebberesi Canfedâ bt. Abdullah’a ve evlâdına ve evlâd-ı evlâdına ba‘de’l-inkırâz mecmû‘-ı menzil-i mezbûr vâlidem Âdile’ye ba‘dehâ evlâd-ı evlâdına ba‘de’l-inkırâz rûhi için beher yevm üçer İhlâs ve birer Fâtiha-i şerîfe tilâvet etmek üzre re’y-i hâkim ile sulehâ-i muhtâcînden bir recül-i sâlihe şart ve ta‘yîn ve teslîm-i mütevellî ve târih-i mezbûrda medîne-i mezbûrede hilâfete müvellâ olan mevlânâ Ahmed Efendi huzûrunda tescîl-i şer‘î etmeğin nevbet-i süknâ-yı menzil-i mezbûr mezkûre Canfedâ’ya yetişmekle şart-ı vâkıfe üzre sâkine iken fevt olup evlâdı olmamağın menzil-i mezbûr ber mûceb-i şart-ı vâkıfe bana âid olmuşken mezbûr es-Seyyid Mahmud menzil-i mezbûrda fuzûlen sâkin olup bana mâni‘ olur hâlâ suâl olunup kasr-ı yedine tenbîh olunmak matlûbumdur deyicek gıbbe’s-suâl mezbûr es-Seyyid Mahmud cevâbında fi’l-vâki‘ vâkıfe-i mezbûre menzil-i mahdûd-ı mezkûru bâlâda bast ve tahrîr olunduğu üzre vakf-ı sahîh ve lâzım ile vakf ve haps ve süknâsı kendiden sonra zevci mezbûra, ba‘dehû oğlu merkūma, ba‘dehû evlâdına ve evlâd-ı evlâdına ve evlâd-ı evlâd-ı evlâdına, ba‘de’l-inkırâz bir odasını müdebberesi mezbûre Kâmuran ve bir odasını müdebberesi Canfedâ’ya ve bir odasını rabîbesi Fâtıma bt. Mehmed ba‘dehünne evlâdlarına ve evlâd ve evlâdlarına ba‘de’l-inkırâz vech-i muharrer üzre sâlihâdan bir recül-i sâlihe şart ve ta‘yîn ve vakfiye-i ma‘mûlün-bihâsında minvâl-i muharrer üzre tahrîr ve tastîr ettirmekle nevbet-i süknâ-yı menzil-i mezbûr merkūme Kâmuran’a yetişip ol dahi hâlâ fevt olup şurûtün-lehümâdan biri dahi hayâtda olmamağın menzil-i mezbûru hâkimü’ş-şer‘ şart-ı vâkıfe üzre bana tevcîh ve yedime hüccet-i şer‘iyye vermeğin menzil-i mezbûrda sâkin olurum deyû târih-i mezbûr ile müverrah ve mevlânâ-yı mezbûr imzâsıyla mümzâ ve hatmiyle mahtûm min külli’l-vücûh takrîrine muvâfık vakfiye ibrâz edip feth ve kırâat olunup ve müdde‘iye-i mezbûrenin vâlidesine ve kendisine şart bulunmamağın ve mezbûre müdde‘âsını isbâta dahi kādire olmayıp merkūm es-Seyyid Mahmud süknâya muhtâc sulehâdan olduğunu sikāt haber vermeğin mezbûre Râziye bî-vech ta‘arruzdan men‘ ve menzil-i merkūm mezkûr es-Seyyid Mahmud yedinde şart-ı vâkıfe üzre ibkā ve tekarrür kılınıp mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Mahmud Efendi b. Mehmed el-İmâm, Fahrü’l-müderrisîni’l-kirâm Abdülbâkī eş-şehîr bi Uşşâkīzâde, Hamza Efendi b. Hasan nâib-i recül, Mehmed Beşe b. Musli, Musli Çelebi b. Abdullah, Sâlih Mehmed Efendi b. Mehmed, Ali Beşe b. Emrullah, Receb Bey Kethüdâ, Dilâver b. Abdullah, Mehmed b. Mahmud ve gayruhüm mine’l-hâzırîn.