Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 238 Hüküm no: 241 Orijinal metin no: [53a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Mehmed Ağa ve hizmetkârlarının, Osman Ağa’nın korusundan izinsiz kereste kesip kendisini tehdit ettikleri Sâbıkan elli dördüncü bölük’de çorbacı ve ta‘lîmhânecibaşı olan bâ‘isü’r-rakīm kıdvetü’l-emâsil ve’l-akrân Osman Ağa b. ( ) meclis-i şer‘de Havâss-ı Aliyye kazâsına tâbi‘ Terkos nâhiyesi a‘mâlinden Ağaçlı nâm karyede vâki‘ mülk çiftliğin câr-ı olan umdetü’l-emâcid ve’l-ekârim Mehmed Ağa’nın sulbî kebîr oğlu Mustafa Çelebi nâm cündî mahzarında üzerine takrîr-i da‘vâ edip merhûm ve mağfûrun-leh Sultan Bayezid Hân-ı Velî evkāfı arâzisinden mukāta‘a-i ma‘lûme ile zabt ve taht-ı tasarrufumda [olan] korumdan bundan akdem mezbûr Mustafa Çelebi benim izin ve icâzetim yoğiken birkaç def‘a kereste ve odun kat‘ etmeğin ben dahi şeyhülislâm müfti’l-enâm -sellemehü’s-selâm- hazretlerinden istiftâ eylediğimde cevâb-ı bâ sevâblarında ta‘zîr ettirilir deyû buyurmağla ben dahi husûs-ı mezbûru merkūmdan da‘vâ sadedinde iken târih-i kitâbdan bir ay mukaddem merkūm Mustafa Çelebi dört hizmetkârlarıyla ellerinde hançer ve tüfenk ve balta ve sâir âlât-ı harb ile karye-i mezbûrede kapıma gelip işte koca domuz korunu kesmeye gideriz eğer gelir[sen] seni dahi katl ederiz deyû mezbûr Mustafa Çelebi bi’z-zât hançer ve sâirleri dahi âlât-ı harble üzerime hücûm eylediklerinde karye-i mezbûre sâkinlerinden ba‘zı kimesneler beni taşra çıkmakdan men‘ etmeğin mezbûr korumdan yedi sekiz araba kereste dahi kat‘ ve ırzımı hedm eylediğinden mâ‘adâ elbette bir gün katl ederim deyû her bâr gadr ve hayf eylemekden hâlî değildir, suâl olunup ihkāk-ı hak olunmak matlûbumdur deyicek mezbûr Mustafa Çelebi ol korudan vech-i muharrer üzre kat‘ eylediğini ikrâr, lâkin müdde‘î-i mezbûrun üzerine kendi hizmetkârları âlât-ı harble hücûm ve minvâl-i mübeyyen üzre şütûmlarını inkâr etmeğin müdde‘î-i mezbûrdan sıdk-ı makālini mübeyyine beyyine taleb olundukda udûl-i müslimînden olup nâhiye-i mezbûreye tâbi‘ Pirincî nâm karye sükkânından Hasan b. Ali ve Harâmîderesi bahçesi ustası Turhan Usta b. Ahmed ve Mehmed b. Ahmed nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ târih-i mezbûrda merkūm Mustafa Çelebi dört nefer hizmetkârlar ile târih-i mezbûrda müdde‘î-i mezbûrun kapısı önüne ellerinde hançer ve tüfenk ve balta ve sâir âlât-ı harb ile gelip mezbûra, Koca domuz korunu kesmeye gideriz eğer gelirsen seni dahi katl ederiz deyû mezbûr Mustafa Çelebi bi’z-zât hançer ile ve sâirleri dahi âlât-ı harb ile üzerine hücûm eylediler hattâ biz müdde‘î-i mezbûru taşra çıkmakdan men‘ eyledik yoksa bir fesâd-ı azîm olmak mukarrer idi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûl olmağın mâ hüve’l-vâki‘ kayd şüd. Fi’l-yevmi’s-sânî ve’l-ışrîn min şehri Şevvâli’l-mükerrem li sene isneteyn ve seb‘în ve elf. Şuhûdü’l-hâl: Sâlih Efendi b. Mehmed, Mehmed Beşe b. Musli, Ali Beşe b. Emrullah, Hüseyin b. Hasan, Mehmed b. Mahmud ve gayruhüm mine’l-hâzırîn.