Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 239 Hüküm no: 242 Orijinal metin no: [53a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Keyvan’ın evini Hacı Musa b. İbrahim’e satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Takyecibaşı mahallesi sâkinelerinden Ayşe bt. Keyvan nâm hâtun meclis-i şerî‘at-ı şerîfede işbu râfi‘ü’l-kitâb el-Hâc Musa b. İbrahim nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan Çeke Mehmed Çelebi kızı tasarrufunda olan vakıf menzil ve bir tarafdan Hasan Çelebi mülkü ve bir tarafdan Ayşe Hâtun mülkü ve bir tarafdan Kâmile Hâtun mülkü ve tarîk-i hâs ile mahdûd fevkānî iki bâb oda ve bir sofa ve tahtânî iki bâb oda ve karşısında üç bâb tahtânî oda dahi ve kapı önünde Fâtıma Hâtun bt. Abdullah’ın fevkānî ve tahtânî oda ve havluyu müştemil mülk menzilinden aşırı tûlen ( ) zirâ‘ ve arzen ( ) bi hesâb-ı şatrancî ( ) zirâ‘ arsa-i hâliyeyi ve su kuyusunu ve zât eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkı ve âmme-i menâfi‘ ve merâfıkı ile mezbûr el-Hâc Musa’ya otuz bir bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t otuz bir bin akçeyi tamamen merkūm el-Hâc Musa yedinden alıp kabz eyledim ba‘de’l-yevm menzil-i mahdûd-ı mezkûrda vechen mine’l-vücûh benim alâkam yokdur. Müşterî-i mezbûrun mülk-i müşterâsı ve hakk-ı sarîhidir. Keyfe mâ yeşâ’ mutasarrıf olsun dedikde mukırra-i mezbûreyi kelimât-ı meşrûhasında el-mukarru lehü’l-mezbûr vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Receb Efendi b. Yusuf, Ahmed Halîfe el-Müezzin, Mehmed Çelebi müezzin-i mahalle-i mezbûr, Musli Çelebi b. Mehmed, Ahmed Çelebi b. Sefer, Ebûbekir Beşe b. Ali, Ali Beşe Çukadâr, Mehmed Çelebi b. Şaban ve gayruhüm.