Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 240 Hüküm no: 243 Orijinal metin no: [53b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia Hatun bt. Mehmed Efendi’nin evini Feridun Ağa Vakfı’na bey‘ bi’l-istiğlâl yoluyla satması Tahakkuk-ı özr-i şer‘î ile husûs-ı âti’z-zikrin mahallinde tahrîr[i] iltimâs olunmağın küttâb-ı mahkemetü’l-bünyândan mevlânâ Sâlih Mehmed Efendi b. Mehmed irsâl olunup ol dahi zeyl-i kitâbda muharrerü’l-esâmî olan müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Çavuş Kasım mahallesinde sâkine olup hâlâ marîza ve sâhibü’l-firâş olmağla meclis-i şer‘a huzûru müte‘azzir olan Topçuzâde demekle ma‘rûfe Râbia Hâtun bt. Mehmed Efendi’nin menziline varılıp akd-i meclis-i şer‘-i şerîf olundukda, mezbûre Râbia Hâtun meclis-i ma‘kūd-ı mezkûrda mahmiye-i İstanbul’da Feridun Ağa merhûm evkāfına bi’l-fi‘l mütevellî olan hâmilü’l-vesîka Derviş Çelebi b. Sinan nâm kimesne mahzarında tav‘an ikrâr ve takrîr-i kelâm edip bundan akdem mâl-ı vakf-ı mezbûrdan her biri sekiz dirhem gelir yüz doksan kıt‘a riyâlî guruş istirbâh ve kabz ve mütevellî-i mezbûr dahi irbâh ve teslîm etmişidi el-hâletü hâzihî silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan es-Seyyid Ali Çelebi mülkü ve bir tarafdan Havva Hâtun mülkü ve tarafeyni mahalle-i mezbûre müezzinine meşrûta menzil ve tarîk-i âm ile mahdûd mülk menzilimi zikr olunan yüz doksan kıt‘a riyâlî guruş ile ma‘an beş yüz kıt‘a riyâlî guruşa alâ tarîki’l-istiğlâl mütevellî-i mezbûra bey‘ edip ol dahi mâl-ı vakf-ı mezbûr ile tarîk-i merkūm üzre iştirâ ve kabûl edip semeni olan meblağ-ı mârrü’z-zikr beş yüz guruşun zikr olunan sekiz dirhemi yüz doksan guruşun üzerine doksan guruşu sekizer dirhem, mâ‘adâ iki yüz otuz guruşunu yedişer dirhem ki cem‘an üç yüz on guruş mâl-ı vakıfdan olmak üzre bana teslîme ta‘ahhüd edip ben dahi hîn-i teslîmde menzil-i mezbûru mütevellî-i mezbûra teslîme ta‘ahhüd eyledim dedikde gıbbe’t-tasdîki’l-mu‘teber vâki‘ü’l-hâli mevlânâ-yı mezbûr mahallinde tahrîr, ba‘dehû ma‘an irsâl olunan Çukadâr Ali Beşe ile meclis-i şer‘a gelip alâ vukū‘ihî inhâ ve takrîr eylediklerinde mâ hüve’l-vâki‘ kayd şüd. Fi’l-yevmi’s-sânî aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Şaban Efendi el-İmâm, Derviş Çelebi b. Ali, es-Seyyid Mehmed b. es-Seyyid Mehmed, Hüseyin Bey b. Hasan ve gayruhüm mine’l-hâzırîn.