Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 241 Hüküm no: 244 Orijinal metin no: [53b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Diyako v. Yani ve diğerlerinin kefâletleri sebebiyle Hacı Seydi Vakfı’na borçlu olduğu Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de el-Hâc Seydi vakf eylediği nukūda bi’l-fi‘l mütevellî olan râfi‘ü’l-kitâb Ahmed Çelebi b. Mehmed meclis-i şer‘de Topal Diyako v. Yani zimmî muvâcehesinde üzerine takrîr-i da‘vâ edip bundan akdem hâlik olan Aleksi v. Yani zimmî, mâl-ı vakf-ı mezbûrdan bi hesâb-ı hurda yirmi dört bin akçe olmak üzre iki yüz kıt‘a riyâlî kebîr guruş hâl-i hayâtında istirbâh ve kabz edip rihânı kalîl olmağla mal[a] kefîl taleb eylediğimde merkūm Topal Diyako ve diğer Diyako ve Terizo ve Polidi nâm zimmîler emr ve kabûlü hâvî kefâlet-i sahîha ile kefîl olup her biri kefâletlerini benim menzilimde huzûr-ı müslimînde ikrâr etmişler iken medyûn-ı merkūm mürd olup rihânını vârisleriyle bey‘ eylediğimde ancak on altı bin iki yüz kırk akçe etmeğin meblağ-ı bâkīnin dahi üç bin akçesini kefîl-i mersûm diğer Diyako’dan ba‘de’t-taleb ve’d-da‘vâ ahz ve kabz etmişidim el-hâletü hâzihî mâl-ı vakf-ı mezbûrdan bâkī kalan dört bin yedi yüz altmış akçeden kefîl-i mezbûr Topal Diyako’nun hissesine isâbet eden bin beş yüz seksen altı akçe mâl-ı vakfı kefîl-i mezbûr Topal Diyako’dan vakf-ı mezbûr için taleb eylediğimde edâdan imtinâ‘ eder hâlâ suâl olunup alıverilmek matlûbumdur deyicek gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda, udûl-i ricâlden fahrü’l-emâsil Hasan Efendi b. Mansur ve el-Hâc Abdülkādir Halîfe b. Numan nâm imâmlar mahfil-i kazâya li ecli’ş-şehâde hâzırân olup istişhâd olunduklarında, fi’l-hakīka hâlik-i merkūm Aleksi mâl-ı vakf-ı mezbûrdan yirmi dört bin akçe olmak üzre mütevellî-i mezbûrdan iki yüz kıt‘a riyâlî guruş-ı kebîr istirbâh eylediklerinde merkūm Topal Diyako ve diğer Diyako ve Terizo ve Polidi bizim huzûrumuzda mütevellî-i mezbûrun menzilinde mâl-ı vakf-ı mezbûru edâ ve teslîme emr ve kabûlü hâvî kefâlet-i sahîha-i şer‘iyye ile kefîl oldular. Biz bu husûsa şâhidleriz, şehâdet dahi ederiz deyû her biri edâ-i şehâdet-i şer‘iyye [54a] eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle meblağ-ı mezbûrdan bin beş yüz seksen altı akçe hissesini vakf-ı mezbûr için mütevellî-i mezbûra edâ ve teslîme tenbîh-i şer‘î olunup mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Sâlih Mehmed Efendi b. Mehmed, Şaban Beşe b. Mustafa el-Gazzâz, Ahmed Beşe b. Ali el-Kalâyî, Hasan Beşe b. Abdullah, Ali Beşe Çukadâr ve gayruhüm mine’l-hâzırîn.