Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 300 Hüküm no: 336 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Muharrem’in atını Hamza b. İlyas’a sattığı ve kavun karpuz bahasından olan borcuyla takas ettiği Vilâyet-i Anadolu’da Gemlik kazâsına tâbi‘ Armudlu nâm karye ahâlîsinden Ahmed b. Muharrem nâm kimesne yine karye-i mezbûre ahâlîsinden işbu bâ‘isü’l-kitâb Hamza b. İlyas nâm kimesne mahzarında ikrâr ve takrîr-i kelâm edip karye-i mezbûrede sâkin Pilavcıoğlu demekle ma‘rûf Mehmed nâm kimesne yedinde olan bir doru aygır mülk bârgirimi mezbûr Hamza’ya bin dört yüz akçeye bey‘ edip ol dahi vech-i muharrer üzre iştirâ eyledikden sonra semeni olan meblağ-ı mezbûru mezbûr Hamza’ya beynimizde mikdârı ma‘lûm kavun ve karpuz bahâsından zimmetimde deynim olan bin dört yüz akçe takās edip ol dahi mukāssa ve kabûl edip zikr olunan bârgiri gāib mezbûr yedinden kabza mezbûr Hamza’yı taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Recebi’l-ferd li sene seb‘a ve seb‘în ve elf. Şuhûdü’l-hâl: Şükrullah Çelebi, Abdi Çelebi, Süleyman Çelebi, Baba Resul.