Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 300 Hüküm no: 337 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. İbrahim’in, Şeyh Ebülvefâ Evkafı’na ait bir arsaya ev yapmasına izin verilmesi İşbu râfi‘atü’l-kitâb Âişe bt. İbrahim nâm hâtun meclis-i şer‘-i şerîf-i Ahmedî ve mahfil-i dîn-i münîf-i Muhammedî’de takrîr-i kelâm edip merhûm Şeyh Ebülvefâ -kuddise sırruhü’l-azîzin evkāfı mülhakâtından olup mahmiye-i mezbûrede ( ) mahallesinde vâki‘ etrâf-ı erba‘adan Âişe Hâtun ve Fâtıma Hâtun menzilleri ve Revânî vakfı olan değirmen ve tarîk-i âm ile mahdûd olup arsası Mehmed Bey nâm sâhibü’l-hayrın sulehâya meşrûta vakfı ve binâsı mülkü olan menzilin mâliki ve mutasarrıfı olan li ebeveyn karındaşım el-Hâc Halil b. İbrahim nâm kimesne vefât edip menzil-i mezbûrun binâsı irsle bana ve vâlidesi Fâtıma Hâtun’a intikāl edip ba‘dehû mezbûre Fâtıma dahi vefât edip sadriye kızı olduğum cihetinden menzil-i mezbûrun binâsından hissesi irsen bana intikāl ettikden sonra vakf-ı mezbûrun mütevellîsi olan umdetü’l-emsâl Ahmed Efendi arsa-i menzil-i mezbûru tasarruf için bin yetmiş yedi Cumâdelâhiresi gurresinden bana izin verip temessüküm kenarına işâret etmişidi nazar olunup mûcebince cânib-i şer‘den li ecli’l-istihkâm hüccet verilmek matlûbumdur deyû mazmûnu min külli’l-vücûh takrîr-i meşrûhunu nâtık ve mütevellî-i mezbûrun hat ve hatmini hâvî temessük ibrâz etmeğin mûcebince cânib-i şer‘den li ecli’l-istihkâm bu vesîka ketb ve terkīm olunup yedine def‘ olundu. Fi’l-yevmi’s-sânî ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, Şükrullah Bey b. Mustafa, İbrahim b. Ahmed, Mustafa Çelebi b. el-Hâc Ahmed, Hasan Çelebi b. Ahmed, Baba Resul.