Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 242 Hüküm no: 245 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksandri v. Kostantin’in evini Mahmud Çavuş Vakfı’na satıp bey‘ bi’l-istiğlâl yoluyla satması Mahmiye-i İstanbul hısnı ebvâbından Ebâ Eyyûb el-Ensârî kapısı dâhilinde Mustafa Paşa mahallesinde sâkin Aleksandri v. Kostantin nâm zimmî merhûm Mahmud Çavuş evkāfı’na bi’l-fi‘l mütevellî olan râfi‘ü’l-kitâb el-Hâc Eyüb b. Süleyman mahzarında ikrâr ve takrîr-i kelâm edip silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan Tavid v. Agop Ermeni ve tarafeyni kendi mülküm ve bir tarafdan tarîk-i âm ile mahdûd mülk menzilimi cemî‘ tevâbi‘ ve levâhıkı ve âmme-i menâfi‘ ve merâfıkı ile mütevellî-i mezbûra iki yüz elli kıt‘a tâmmü’l-vezn riyâlî guruşa alâ tarîki’l-istiğlâl bey‘ edip ol dahi mâl-ı vakf-ı mezbûr ile tarîk-i merkūm üzre iştirâ ve kabûl edip kabz-ı semen-i ma‘dûd ve teslîm-i mebî‘-i mahdûd kıldığımdan sonra yine menzil-i mahdûd-ı mezkûru ba‘de’t-tahliyye ve’t-takābuz târih-i kitâb şehri gurresinden sene tamâmına değin yirmi beş kıt‘a riyâlî guruş icâre ile îcâr ve teslîm, ol dahi vech-i muharrer üzre istîcâr ve tesellüm ve kabz ve kabûl eyledim dedikde gıbbe’t-tasdîki’l-mu‘teber mâ hüve’l-vâki‘ kayd şüd. Tahrîren fi’l-yevmi’s-sânî aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Sâlih Mehmed Efendi b. Mehmed, Ali Beşe Çukadâr, Eyüb Çelebi el-Mukayyid, Dilâver muhzır ve gayruhüm mine’l-hâzırîn.