Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 245 Hüküm no: 249 Orijinal metin no: [54b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in kötü halinden mahallelinin şikâyetci olması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de zâbitü’l-vakt olan Seyfullah Bey b. Ramazan târih-i kitâb günü meclis-i şer‘a gelip takrîr-i kelâm ve ta‘bîr ani’l-merâm edip medîne-i mezbûrede vâki‘ Zeyneb Hâtun mahallesinde Yusuf Ağa nâm kimesnenin menzilinde müste’cire olan Ayşe bt. Mehmed nâm hâtun hâlâ kendisine nâ-mahrem olan iki nefer âdem ile menzil-i mezbûrda oturup mu‘âmele-i fuhuş üzre oldukları mesmû‘um olmağla cânib-i şer‘den üzerine varılıp vâki‘ müşâhede ve mu‘âyene olunmak matlûbumdur deyicek savb-ı şer‘den üzerine mevlânâ Mehmed Efendi b. Hasan irsâl olunup ol dahi zeyl-i kitâbda muharrerü’l-esâmî olan müslimîn ile menzil-i mezbûra varıp husûs-ı mezbûr tefahhus olundukda, fi’l-hakīka mezbûre Ayşe Hâtun sâkine olduğu menzilde kendisine nâ-mahrem hâssa helvacılarından Yusuf b. Mehmed nâm helvacı ahz olunup suâl olundukda, mezbûr Yusuf cevâbında ben mezbûre Ayşe Hâtun’un zevci gāib ani’l-meclis Ahmed Ağa’nın karındaşıyım deyicek mahalle-i mezbûre imâmı Veli Efendi b. Mustafa ve müezzin olan Abdülkādir Halîfe b. İbrahim ve ahâlî-i mahalleden Eyüb Çelebi b. Süleyman ve İbrahim Çelebi b. Mustafa ve Derviş Çelebi b. Hüdâverdi ve Mehmed Çelebi b. Behram ve Hasan Beşe b. Mustafa ve Yusuf b. Torbalı nâm kimesneler meclis-i mezbûrda, merkūm Ayşe her bâr nâ-mahrem kimesneler ile muhtelit olup nâ-mahremden perhîzi olmayıp nâ-ma‘kûl fi‘l üzre idiği ma‘lûmumuzdur merkūme Ayşe bu hâl üzre birkaç gün dahi kalır, menzil-i mezbûrda bu fesâd olmak üzre mukarrerdir. Hattâ biz nice def‘a bu makūle işinden fâriğa ol deyû tenbîh eylediğimizde mütenebbih olmamışdır deyû her biri mezbûre Ayşe’nin sû-i hâlini haber verdiklerinde vâki‘ü’l-hâli mevlânâ-yı mezbûr mahallinde ketb ve tahrîr olundu. Fi’l-yevmi’s-sâlis ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Hüseyin Çelebi b. Ahmed, Mehmed Beşe b. Ahmed, Mehmed Çelebi Çukadâr, Kethadâ Bey ve gayruhüm mine’l-hâzırîn.