Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 245 Hüküm no: 250 Orijinal metin no: [55a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şam Kadısı Ahmed Efendi b. Ebû Said Efendi’nin, Şam’da Sâlihiye mevkiindeki menzilini müderris Müftüzâde Mehmed Emin Efendi’ye satması Mübâya‘a-i âtiyetü’z-zikrin mahallinde tahrîri iltimâs olunmağın savb-ı şerî‘at-ı şerîfeden mevlânâ Sâlih Mehmed Efendi irsâl olunup ol dahi zeyl-i kitâbda muharrerü’l-esâmî olan müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Baba Haydar mahallesi sâkinlerinden olup sâbıkan Şâm-ı şerîfde mesned-nişîn-i şer‘-i Muhammedî olan a‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâ’il, metbû‘ü’l-efâzıl, vâsıl-ı gāyâti’l-ma‘ârif, nâsıb-ı râyâti’l-avârif, misbâh-ı rumûzi’l-hakāyik, miftâh-ı künûzi’d-dekāyık Ahmed Efendi necli’l-mevlâ’l-mevâlî, a‘lemü’l-e‘âlî Hazret-i Ebû Said Efendi’nin sa‘âdet-hânelerine varıp akd-i meclis-i şer‘-i şerîf eylediğinde mûmâ-ileyh Ahmed Efendi hazretleri meclis-i ma‘kūd-ı mezkûrda, işbu târih-i sıhhat-nisâbın sâhibi fahrü’l-müderrisîni’l-kirâm zahrü’l-müdakkikīni’l-fihâm Müftüzâde Mehmed Emin Efendi tarafından ikrâr-ı âti’l-beyânı tasdîke vekîl olup âharı dahi tevkîle me’zûn olup hâlâ başbâkīkulu olan mefharü’l-emâcid ve’l-e‘âlî Mehmed Ağa kıbelinden vekîl olan fahrü’l-akrân Osman Ağa mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup hâric-i medîne-i Şâm-ı şerîf’de Sâlihiyye demekle ma‘lûm mahalde Miskî mahallesinde vâki‘ lede’l-ahâlî ve’l-cîrân ma‘lûmetü’l-hudûd ve’l-cevânib büyût-ı müte‘addide-i fevkāniye ve tahtâniyye ve su dolabı ve zât eşcâr-ı müsmire ve gayr-ı müsmire bahçe ve köşkü müştemil Beyt-i Sarım demekle meşhûr olup sâbıkan Şâm-ı şerîf defterdârı olup hâlâ Safed Paşası olan Ali Paşa’dan iştirâ eylediğim mülk menzilimi cemî‘ tevâbi‘ ve levâhıkı ve âmme-i menâfi‘ ve merâfıkı ile müvekkilim müşârün-ileyh Mehmed Emin Efendi’ye dört yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm edip ol dahi vech-i muharrer üzre iştirâ ve bi’l-vekâle kabûl eyledikden sonra semeni olan mezbûrü’n-na‘t dört yüz esedî guruşu tamamen vekîl-i mezbûr Mehmed Ağa yedinden alıp kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâkam yokdur, müşterî-i mûmâ-ileyh Mehmed Emin Efendi’nin mülk-i mahz-ı müşterâsı ve hakk-ı sarîhi olmuşdur ve menzil-i mahdûd-ı mezkûru mahallinde zabt ve tasarrufa tarafımdan mûmâ-ileyhi taslît eyledim min ba‘d keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber vâki‘ü’l-hâli mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ gıbbe’l-ibtigā ketb olundu. Fi’l-yevmi’s-sâbi‘ ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Fahrü’l-müderrisîni’l-kirâm, zahrü’l-muhakkikīni’l-fihâm kapıcı Ahmed Efendi, Fahrü’l-kuzât Ali Efendi, Abdurrahman Çelebi tâbi‘-i bâyi‘-i müşârün-ileyh, Ali Çelebi el-Hüddâm, Ahmed Bey el-Cündî, Musli Bey el-Cündî, Mustafa Ağa Câmi‘-i avârız, Mehmed Çelebi tâbi‘-i Müftü Efendi ve gayruhüm mine’l-hâzırîn.