Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 247 Hüküm no: 251 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pernika Yasef v. Salamon’un, menzil hissesini ortağı Yasef v. İsak’a satması Kılora Cemâ‘atinden olup mahrûse-i Galata’da sâkin hâlâ medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de yapağıcı olan Pernika Yasef v. Salamon nâm yahudi meclis-i şer‘de mahmiye-i İstanbul hısnı ebvâbından Eyyûb-i Ensârî kapısı hâricinde sâkin olup yine medîne-i mezbûrede yapağıcı olan hâmilü’l-vesîka diğer Yasef v. İsak nâm yahudi muvâcehesinde ikrâr ve takrîr-i kelâm edip bundan akdem silk-i mülk-i sahîhimde münselik olup merkūm diğer Yasef ile ale’l-iştirâki’s-seviy mülkümüz olan emlâkden vilâyet-i Anadolu’da vâki‘ Kudüs-i şerîf’de yahudi mahallesinde bir tarafdan tarîk-i âm ile mahdûd iki bâb fevkānî oda ve bir matbah ve bir selâmlık ve iki mahzeni müştemil olup nısfı benim ve nısf-ı âharı merkūm diğer Yasef’in mülkümüz olan menzilde benim hissem olan nısf-ı şâyi‘ini târih-i kitâbdan dört sene mukaddem mesfûr diğer Yasef ile beynimizde fesh-i akd-i şirket eylediğimizde merkūm diğer Yasef on bir bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ edip ol dahi vech-i muharrer üzre iştirâ ve kabûl edip semeni olan mezbûrü’n-na‘t on bir bin akçeyi tamamen merkūm diğer Yasef yedinden alıp kabz edip menzil-i mahdûd-ı mezkûrda olan nısf hisse-i şer‘iyye-i şâyi‘amı mahallinde zabt ve tasarrufa tarafımdan merkūm diğer Yasef’i taslît eylemişdim el-hâletü hâzihî mecmû‘-ı menzil-i mahdûd-ı mezkûrda vechen mine’l-vücûh benim alâkam yokdur, mesfûr diğer Yasef’in mülk-i müşterâsıdır. Keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Muharrir-i hurûf Sâlih Mehmed Efendi b. Mehmed, Ali Beşe b. Emrullah, Receb Kethüdâ b. Maden, Dilâver b. Abdullah ve gayruhüm mine’l-hâzırîn.