Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 250 Hüküm no: 257 Orijinal metin no: [56a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kiryaki v. Dimitri’nin Fâtıma’nın vasîsi olan Siyavuş Efendi’ye olan borcunu vârislerinin istiğlâl yoluyla ödemesi Havâss-ı Aliyye kazâsı tevâbi‘inden Cuhûd Burgaz nâm karyede sâkin iken bundan akdem hâlik olan Kiryaki v. Dimitri nâm zimmînin zevcesi Komini bt. ( ) nâm nasrâniye ile sulbî kebîr oğulları Yorgo ve Dimitri nâm zimmîler meclis-i şer‘de Vidos nâm karyede sâkin Siyavuş Efendi kıbelinden ikrâr-ı âti’z-zikri tasdîke vekîl olup bimâ hüve nehci’s-sübût şer‘an vekâleti sâbite olan Mehmed Bey b. Ali nâm ser-bölük mahzarında her biri ikrâr ve takrîr-i kelâm edip mûrisimiz hâlik-i mezbûrun müvekkil-i merkūm Siyavuş Efendi’nin sulbiye sagīre kızı Fâtıma’nın mâl-ı mevrûsundan yüz on üç kıt‘a tâmmü’l-vezn riyâlî guruş deyni olup kable’l-edâ mürd olmağla deyni ve muhallefâtı irsen bize intikāl etmeğin biz dahi emlâk-i mevrûsemizden karye-i mezbûrede vâki‘ bir tarafdan Şehri mülkü ve bir tarafdan abacı Mihal mülkü ve tarafeyni arsa-i hâliye ile mahdûd mecmû‘ mülk menzilimizi, müvekkil-i mezbûra mârrü’z-zikr yüz on üç kıt‘a riyâlî guruş mukābelesinde alâ tarîki’l-istiğlâl bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl eyledikden sonra menzil-i mahdûd-ı mezkûru ba‘de’t-tahliyye ve’t-tekābuz târih-i kitâb şehri gurresinden üç sene tamâmına değin onu on bir buçuk hesâbı üzre icâre ile yine bize îcâr ve teslîm, biz dahi vech-i mübeyyen üzre istîcâr ve tesellüm ve kabz ve kabûl eyledik dediklerinde gıbbe’t-tasdîki’l-mu‘teber, mâ hüve’l-vâki‘ kayd şüd. Fi’l-yevmi’t-tâsi‘ ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Mustafa Çelebi b. Yusuf, Durmuş Beşe b. Hasan, Osman Dede b. Mustafa, Ahmed Beşe b. Abdullah, Hamza Efendi nâib-i recül, Veli Beşe Çukadâr, Receb Kethüdâ b. Maden, Mehmed b. Mahmud, Hüseyin muhzır ve gayruhüm mine’l-hâzırîn.