Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 251 Hüküm no: 258 Orijinal metin no: [56b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muammer bt. Abdullah’ın evini Derviş Bey b. Ahmed’e satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Sofular mahallesinde sâkine Muammer bt. Abdullah nâm hâtun meclis-i şer‘-i hatîr-i lâzımü’t-tevkīrde zevci işbu sâhibü’l-kitâb Derviş Bey b. Ahmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkden mahalle-i mezbûrede vâki‘ bir tarafdan kendi mülküm ve bir tarafdan Ahmed mülkü ve bir tarafdan Halil Çelebi mülkü ve bir tarafdan tarîk-i hâs ile mahdûd bir bâb fevkānî oda ve sofa ve ahırı ve sokak kapısını müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık zevcim mezbûr Derviş Bey’e on bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t on bin akçeyi tamamen zevcim merkūm Derviş Bey yedinden alıp kabz eyledim ba‘de’l-yevm menzil-i mahdûd-ı mezkûrda vechen mine’l-vücûh benim alâkam yokdur, zevcim mezbûr Derviş Bey’in mülk-i mahz-ı müşterâsı ve hakk-ı sarîhidir, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘iyyi’l-vicâhiyyi’l-mu‘teber, mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Fahrü’l-kuzât Mehmed Efendi b. Hâbil, Mustafa Çelebi b. Ebûbekr Efendi İmâmzâde, Mustafa Çelebi b. Bayram el-Müezzin, Ali Bey el-Cündî, Mustafa Çelebi b. Hüseyin el-Cündî, Ali Çelebi b. Mustafa, Ali Beşe Çukadâr, Hüseyin muhzır ve gayruhüm mine’l-hâzırîn.