Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 252 Hüküm no: 259 Orijinal metin no: [56b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muammer bt. Abdullah’ın kocası Derviş b. Ahmed’e mehrinin bir kısmını hibe etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Sofular mahallesi sâkinelerinden Muammer bt. Abdullah nâm hâtun meclis-i şer‘de zevci işbu hâmilü’l-kitâb Derviş b. Ahmed nâm kimesne mahzarında bi tav‘ihâ ikrâr ve takrîr-i kelâm edip zevcim mezbûr Derviş Bey zimmetinde mütekarrir olan yedi bin iki yüz akçe mehr-i müeccelimin üç bin iki yüz akçesini zevcim mezbûr Derviş Bey’e hibe-i sahîha-i şer‘iyye ile hibe ve temlîk eylediğimde ol dahi meclis-i hibede ittihâb ve temellük ve kabûl edip bana bir donluk kırmızı atlas dahi hibe ve teslîm, ben dahi ittihâb ve temellük ve tesellüm ve kabz ve kabûl eylemişimdir ba‘de’l-yevm zevcim mezbûr zimmetinde ancak dört bin akçe mehr-i müeccelim bâkī kalıp üç bin iki yüz akçesi zevcim mezbûrun mülk-i mevhûbudur, benim alâkam yokdur dedikde gıbbe’t-tasdîki’l-mu‘teber hâkim-i muvakki‘-i sadr-ı kitâb tûbâ-lehû ve hüsnü me’âb hazretleri kıbelinden sıhhat-i hibe-i mezkûreye hükm birle mâ hüve’l-vâki‘ bi’l-ibtigā ketb olundu. Tahrîren fi’l-yevmi’s-sâmin ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Fahrü’l-kuzât Mehmed Efendi b. Hâbil, Mustafa Çelebi İmâmzâde, Mustafa Çelebi b. Hüseyin el-Cündî, Mehmed Çelebi b. Bayram el-Müezzin, Ali Çelebi b. Mustafa, Ali Beşe Çukadâr, Ali Bey Çukadâr, Ebû Said Efendi, Hüseyin Muhzır, Mehmed muhzır ve gayruhüm mine’l-hâzırîn.