Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 256 Hüküm no: 265 Orijinal metin no: [57b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Yorgo’nun Mustafa Efendi Evkafı’na borcu olduğu Havâss-ı Aliyye kazâsına tâbi‘ Avasya karyesi sâkinlerinden Dimitri v. Yorgo nâm zimmî meclis-i şer‘-i hatîr-i lâzımü’t-tevkīrde medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ merhûm Mustafa Efendi evkāfı’na bi’l-fi‘l mütevellî olan râfi‘ü’l-kitâb Mustafa Çelebi b. Hüdâverdi mahzarında ikrâr ve takrîr-i kelâm edip mâl-ı vakf-ı mezbûrdan onu on bir buçuk hesâbı üzre üç bin fıddî nakd-i râyic fi’l-vakt akçe asıl ve târih-i kitâbdan üç yüz altmış gün tamâmına değin müeccel ve mev‘ûd, zirâ‘ı ve kıymeti ve levni ve cinsi beynimizde ilm-i şer‘î birle ma‘lûm mütevellî-i mezbûr yedinden müşterâ ve makbûza çuka bahâsından dahi dört yüz elli akçe ki cem‘an üç bin dört yüz elli akçe vakf-ı mezbûra zimmetimde lâzımü’l-edâ deynimdir deyû tav‘an ikrâr ve i‘tirâf etmeğin gıbbe’t-tasdîki’l-mu‘teber mukırr-ı mezbûrun li ebeveyn karındaşı Ergiri v. Yorgo meblağ-ı mezbûru ve ecel-i merkūm tamâmında mârrü’z-zikr çuka bahâsını mütevellî-i mezbûra edâ ve teslîme emr ve kabûlü hâvî kefâlet-i sahîha-i şer‘iyye ile meclis-i mezbûrda kefîl olmağın men lehü’t-tasdîk kıbelinden ba‘de’l-kabûl mâ cerâ bi’t-taleb ketb olundu. Fi’l-yevmi’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Mustafa Çelebi b. Pervâne, Receb Bey b. Habib, Hüseyin Beşe b. Hasan Muhzır, Mehmed Çelebi b. Ahmed Muhzır, Dilâver b. Abdullah muhzır ve gayruhüm mine’l-hâzırîn.