Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 257 Hüküm no: 266 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rukiye Hanım bt. Musa Paşa’nın Ömer Paşa’da olan alacağının kefili Receb Paşazâde Süleyman Bey’in terekesinden ödenmesi Yâ Fettâh Mahmiye-i İstanbul’da Ayasofya kurbunda Üskübî mahallesi sâkinelerinden umdetü’l-muhadderât zübdetü’l-muvakkarât Rukiye Hanım bt. el-merhûm Musa Paşa kıbelinden meblağ-ı âti’l-beyânı taleb ve da‘vâ ve ahz ü kabz ve kendisine îsâle vekîl olup mûmâ-ileyhânın zâtını ma‘rifet-i şer‘iyye ile ârifân olan şerefü’l-akrân Hüseyin Ağa b. Hasan ve Mehmed Bey b. Hasan şehâdetleriyle şer‘an vekâleti sâbite olan Mehmed Çelebi b. Hasan Halîfezâde mahfil-i kazâda medîne-i Ebâ Eyyûb’da Nişancı Paşa mahallesi sâkinlerinden iken bundan akdem vefât eden Receb Paşazâde Süleyman Bey merhûmun li eb karındaşı Ahmed Bey’in sulbî kebîr oğlu ve min ciheti’l-usûbeti’n-nesebiyye vârisi olan Mehmed Bey kıbelinden husûmet ve redd-i cevâba vekîl olup Mehmed Bey b. Ömer ve Halil Çelebi b. İbrahim şehâdetleriyle şer‘an vekâleti sâbite olan fahrü’l-emâsil Ali Ağa b. Mehmed mahzarında bi’l-vekâle üzerine da‘vâ ve takrîr-i kelâm edip müvekkilem mûmâ-ileyhâ Rukiye Hanım’ın Ma‘arratü’n-nu‘mân livâsına mutasarrıf iken bundan akdem intikāl-i dâr-ı bekā eden Ömer Paşa zimmetinde cihet-i karz-ı [şer‘î]den olan yüz bin akçe hakkına merhûm mezbûr Süleyman Bey ve bir kaç kimesneler kefîl bi’l-mâl olmağla merhûm-ı mûmâ-ileyh Ömer Paşa meblağ-ı mezbûr kırk bin akçesini hâl-i hayâtında müvekkilem müşârün-ileyhâ Rukiye Hanım’a teslîm için merhûm-ı müşârün-ileyh Süleyman Bey’e gāib ani’l-meclis el-Hâc Abdullah nâm tâcir ile irsâl edip ol dahi aynıyla zikr olunan kırk bin akçeyi huzûr-ı müslimînde merhûm mûmâ-ileyhe def‘ ve teslîm, ol dahi kendi mesârifine sarf ile istihlâk etmeğin meblağ-ı mezbûr ile’l-ân müteveffâ-yı mezbûr Süleyman zimmetinde bâkī kalmışdı el-hâletü hâzihî vârisi olan li eb birâderzâdesi müşârün-ileyh Mehmed Bey’in vekîli mûmâ-ileyh Ali Ağa’dan suâl olunup muhallefât-ı müteveffâ-yı mûmâ-ileyhden meblağ-ı mârrü’z-zikrin alıverilmesi için vekîl-i müşârün-ileyhe bi’l-vekâle tenbîh olunmak matlûbumdur deyicek gıbbe’s-suâl ve’l-inkâr ve akībe’l-istişhâd udûl-i ricâlden olup merhûm-ı mûmâ-ileyh tevâbi‘inden mahmiye-i mezbûrede Elvanzâde mahallesinde sâkin Mustafa Çavuş b. Derviş ve Zal Paşa câmi‘i’nde mütemekkin es-Seyyid Ömer Çelebi b. es-Seyyid Abdülbâkī el-Çelebi li ecli’ş-şehâde makām-ı kazâya hâzırân olup istişhâd olunduklarında, fi’l-vâki‘ merhûm Süleyman Bey hâl-i hayâtında tâcir-i merkūm el-Hâc Abdullah işbu kırk bin akçeyi sana hâlâ Ma‘arretü’n-nu‘mân beyi Ömer Paşa, Rukiye Hanım’a teslîm için irsâl eylemişdir deyû bizim huzûrumuzda def‘ ve teslîm, ol dahi ba‘de’l-ad alıp kabz ve tesellüm ve kendi mesârifine sarf ile istihlâk edip ile’l-ân meblağ-ı mezbûr merhûm Süleyman Bey zimmetinde kalmışdır biz bu husûsa bu vech üzre şâhidleriz, şehâdet dahi ederiz deyicek her biri edâ-i şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri makbûle oldukdan sonra bi hasebi’ş-şer‘i’ş-şerîf müvekkile-i mûmâ-ileyhâya yemîn lâzım gelip lâkin müvekkile-i mûmâ-ileyhâ muhadderâtdan olmağla meclis-i şer‘a huzûru mümkün olmamağın li ecli’l-istihlâf kıbel-i şer‘den mevlânâ Hamza Efendi b. Hasan irsâl olunup ol dahi zeyl-i vesîkada muharrerü’l-esâmî olan müslimîn ile müvekkile-i mûmâ-ileyhânın menziline varıp akd-i meclis-i şer‘ edip meblağ-ı mârrü’z-zikr kırk bin akçeden küllen ve ba‘zan merkūm müşârün-ileyh Süleyman Bey’den ahz ve istîfâ veya hibe ve yâhud âhara havâle veya taraf-ı şer‘îden biriyle zimmetini ibrâ eylemediğine müvekkile-i mûmâ-ileyhâya yemîn teklîf eylediğinde ol dahi meclis-i ma‘kūd-ı mezkûrda alâ vefki’l-mes’ûl yemîn billâhi te‘âlâ etmeğin vâki‘ hâli mevlânâ-yı mezbûr mahallinde tahrîr, ba‘dehû meclis-i şer‘de alâ vukū‘ihî inhâ ve takrîr-i kelâm etmeğin mûcebiyle zikr olunan kırk bin akçeyi müteveffâ-yı mûmâ-ileyhin muhallefâtından müvekkile-i müşârün-ileyhâ için vekîl-i mezbûra edâ ve teslîme ikrâra vekîl-i âhar mûmâ-ileyh Osman Ağa’ya tenbîh birle mâ cerâ bi’t-taleb ketb olundu. Fi’l-yevmi’l-hâmis aşer min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Kıdvetü’l-emâcid ve’l-ekârim es-Seyyid Mustafa Ağa kethüdâ-yı sâbık-ı paşa-yı merkūm, Beşir Çavuş b. Mehmed Çavuş el-Mübâşir el-mühtedî, Mustafa Bey b. Süleyman el-mühtedî, Fahrü’l-kuzât Ahmed Efendi b. Hasan el-Kadı ve gayruhüm mine’l-hâzırîn.