Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 258 Hüküm no: 267 Orijinal metin no: [58a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Mehmed’in bağını Ömer Çelebi b. Yusuf’a satması Vilâyet-i Anadolu’da Eğin kazâsına tâbi‘ Encüge nâm karyede sâkin Ahmed Bey b. Mehmed nâm kimesne meclis-i şerî‘at-ı şerîfede yine karye-i mezbûre sükkânından işbu râfi‘ü’l-kitâb Ömer Çelebi b. Yusuf nâm kimesne tarafından ikrâr-ı câ’i’z-zikri tasdîke vekîl olup bimâ hüve nehci’s-sübût şer‘an vekâleti sâbite olan babası mezbûr Yusuf Beşe mahzarında ikrâr ve takrîr-i kelâm edip akd-i âti’z-zikrin sudûruna değin zabt ve tasarrufumda olan emlâkimden olup karye-i mezbûre hudûdu dâhilinde vâki‘ bir tarafdan Yusuf Beşe b. Ahmed nâm kimesne bağı ve bir tarafdan Kirakos nâm Ermeni bağı ve bir tarafdan Kostak v. Kirkos bağına ve taraf-ı râbi‘i Ovanes nâm Ermeni bağı ile mahdûd olan bir kıt‘a bağımı cümle tevâbi‘ ve levâhıkı ile müvekkil-i mezbûr Ömer Çelebi’ye kırk beş kıt‘a riyâlî-i kebîr guruşa tarafeynden îcâb ve kabûlü hâvî bey‘-i bâtt-ı kat‘î ile bey‘ eyleyip vekîl-i mezbûr Yusuf Beşe müvekkil-i mezbûr Ömer Çelebi için ol dahi minvâl-i muharrer üzre iştirâ ve kabûl edip semeni olan meblağ-ı mezbûrü’n-na‘t kırk beş kıt‘a riyâlî-i kebîr guruş vekîl-i mezbûr yedinden tamamen alıp kabz eylediğimden sonra sâlifü’z-zikr bir kıt‘a bağı mahallinde ahz ü kabz zabt ve tasarrufa tarafımdan müvekkil-i mezbûr Ömer Çelebi’yi taslît eyledim min ba‘d mârrü’z-zikr bağ-ı mahdûd-ı mezkûr müvekkil-i mezbûrun mülk-i müşterâsıdır. Min ba‘d benim alâka ve medhalim [yokdur] dedikde mukırr-ı mezbûrun vech-i muharrer üzre cârî ve sâdır olan ikrârını vekîl-i mezbûr Yusuf Beşe bi’l-vekâle tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Zilka‘deti’ş-şerîfe li sene isneteyn ve seb‘în ve elf. [Şuhûdü’l-hâl:] Osman Beşe b. Sinan, es-Seyyid Mehmed Bey b. es-Seyyid Ali, Sumakīoğlu Mustafa Çelebi, Ömer Çelebi b. Mehmed Ağa, Mustafa Çelebi b. Sefer Bey, Hasan Çelebi b. Ali, Receb Beşe b. Abdullah, Hasan Çelebi b. Ömer ve gayruhüm mine’l-hâzırîn.