Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 260 Hüküm no: 269 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Halife b. Sefer Hâce’nin evini Ferruh Bey Evkafı’na bey‘ bi’l-istiğlâl yoluyla satması Zikri âtî istiğlâlin mahallinde tahrîri iltimâs olunmağın savb-ı şerî‘at-ı şerîfeden mevlânâ Sâlih Efendi b. Mehmed irsâl olunup ol dahi zeyl-i sahîfede muharrerü’l-esâmî olan cemâ‘at-i müslimîn ile medîne-i Hazret-i Ebâ Eyyûb el-Ensârî -âmilehu’llâhu te‘âlâ bi mennihi’l-Bârî-’de Şeyh Ahmed mahallesinde sâkin olup hâlâ Otakçıbaşı mahallesi imâmı olan Mehmed Halîfe b. Sefer Hâce’nin menziline varılıp akd-i meclis-i şerî‘at-ı şerîfe eylediğinde mezbûr Mehmed Halîfe meclis-i ma‘kūd-ı mezkûrda merhûm Ferruh Bey evkāfı’na bi’l-fi‘l mütevellî olan râfi‘ü’l-kitâb Mustafa Çelebi b. eş-Şeyh Mehmed mahzarında ikrâr ve takrîr-i kelâm edip bundan akdem hâzır bi’l-meclis Pîr Mehmed Çelebi b. Mahmud nâm kimesneden semen-i ma‘lûma iştirâ eylediğim emlâkimden mahalle-i mezbûrede vâki‘ bir tarafdan İsmihan Hâtun mülkü ve bir tarafdan Yakub Ağa vakfı ve bir tarafdan yine benim âhar mülküm ve bir tarafdan tarîk-i âm ile mahdûd mülk menzilimi cemî‘-i tevâbi‘ ve levâhıkı ve âmme-i menâfi‘ ve merâfıkı ile mütevellî-i mezbûra iki yüz kıt‘a tâmmü’l-vezn sahîhü’l-ayâr riyâlî guruş-ı kebîr ve altı bin fıddî nakd-i râyic fi’l-vakt akçe ki bi hesâbı hurda yirmi dört bin fıddî nakd-i râyic fi’l-vakt akçeye alâ tarîki’l-istiğlâl bey‘ ve teslîm, ol dahi mâl-ı vakf-ı mezbûr ile tarîk-i mezbûr üzre iştirâ ve kabûl ve tesellüm edip kabz-ı semen-i ma‘dûd ve tesellüm-i mebî‘-i mahdûd kıldığımdan sonra yine menzil-i mahdûd-ı mezkûru mütevellî-i mezbûra ba‘de’t-tahliyye ve’t-tekābuz târih-i kitâb şehri gurresinden sene tamâmına değin üç bin altı yüz akçe icâre ile bana îcâr ve teslîm, ben dahi vech-i muharrer üzre istîcâr ve tesellüm ve kabz ve kabûl eyledim dedikde gıbbe’t-tasdîki’l-mu‘teber yine mahalle-i mezbûre sükkânından Seydi Bey b. Kubad ve bâyi‘-i evvel Pîr Mehmed Çelebi’nin zevcesi Ayşe Hâtun bt. Abdullah nâm musâhabe ve Ahmed Çelebi b. Mehmed derk-i menzil-i mahdûd-ı mezkûr ve ücret-i merkūme ve asl-ı mâl-ı merkūmun küllîsine meclis-i mezbûr[da] emr ve kabûlü hâvî kefâlet-i sahîha-i şer‘iyye ile kefîl olduk dediklerinde men lehü’t-tasdîk kıbelinden ba‘de’l-kabûl vâki‘ü’l-hâli mevlânâ-yı mezbûr mahallinde tahrîr, ba‘dehû meclis-i şer‘a [gelip] alâ vukū‘ihî inhâ ve takrîr etmeğin mâ cerâ bi’t-taleb ketb u imlâ olundu. Fi’l-yevmi’t-tâsi‘ aşer min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Receb Çavuş el-Mübâşir, Mehmed Efendi b. Hasan, Mustafa Çelebi b. Receb Çavuş, Bağdad Mehmed Çelebi, Ahmed Çelebi el-Müezzin, Mustafa b. Ahmed, Ali Çelebi b. Seydi, Ramazan Çelebi b. Hüseyin, Hüseyin muhzır ve gayruhüm mine’l-hâzırîn.