Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 301 Hüküm no: 339 Orijinal metin no: [44b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şam Trablusu Beylerbeyisi Kanber Mustafa Paşa’nın adamı Mehmed Ağa’nın haksız yere aldığı cerime parasını sahiplerine geri ödemesi Fazîletlü Efendi Hazretlerinin imzâsıyladır. Vilâyet-i Anadolu’da Şam Trablusu eyâletinde Avrat Adası kasabası ahâlîsinden bâ‘iseteyi’l-kitâb İbrahim ve Fethullah ibney Mustafa nâm karındaşlar dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde Şam Trablusu beylerbeyisi olan Kanbur Mustafa Paşa’nın etbâ‘ından olup mahmiye-i İstanbul’da Şeyh Ebülvefâ mahallesinde sâkin Mehmed Ağa b. Ahmed nâm kimesne mahzarında üzerine da‘vâ ve takrîr-i kelâm edip paşa-yı mûmâ-ileyh Şam Trablusu beylerbeyisi iken mezbûr Mehmed Ağa birkaç kimesneler ile kal‘a ağası üzerine hücûm etmişsiz deyû bizi ahz ve haps edip cerîme deyû dört yüz guruşumuzu almışdı, suâl olunup meblağ-ı mezbûrun merkūm Mehmed Ağa’dan alıverilmesi matlûbumuzdur dediklerinde, gıbbe’s-suâl ve’l-inkâr müdde‘iyân-ı mezbûrândan müdde‘âlarını mübeyyine beyyine taleb olundukda kasaba-i mezbûre ahâlîsinden olup mahmiye-i mezbûrda Mercan Çarşı kurbunda vâki‘ Sultanhanı’nda sâkin Ali b. el-Hâc Mehmed ve Atpazarı kurbunda Manisalı Çelebi mahallesinde Hüseyin b. Ali nâm kimesneler li ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka mûmâ-ileyh Mustafa Paşa, Şam Trablusu beylerbeyisi iken mezbûr Mehmed Ağa birkaç kimesneler kal‘a ağası üzerine hücûm etmişsiz deyû müdde‘iyân-ı mezbûrânı ahz ve haps edip cerîme deyû bizim huzûrumuzda dört yüz guruşlarını ahz u kabz etmiş idi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince meblağ-ı mezbûr dört yüz guruşu müdde‘iyân-ı mezbûrâna edâya merkūm Mehmed Ağa’ya tenbîh birle mâ hüve’l-vâki‘ bi’l-ibtigā ketb ve imlâ olundu. Fi’l-yevmi’l-hâmis ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Umdetü erbâbi’t-tahrîr ve’l-kalem Ebûbekir Efendi Tezkireci-i evvel, mefharü erbâbi’t-tastîr ve’r-rakam Mustafa Efendi Tezkireci-i sânî, umdetü’l-emâcid ve’l-ekârim İsmail Ağa Serçavûşân, umdetü’l-eşbâh Eyüb Ağa Kethüdâ-yı hazret-i efendi