Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 302 Hüküm no: 340 Orijinal metin no: [44b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kaba Kondelko v. Dobre’nin vârisi olmadığı gerekçesiyle el konulan terekesinin kardeşleri Kirço ve Rago’ya geri verildiği Fazîletlü Efendi Hazretlerinin imzâsıyladır. Fi’l-asl vilâyet-i Rumeli’nde Ruskasrı kazâsına tâbi‘ Karapınar nâm karyeden olup vilâyet-i mezbûrede Kızılağaç kazâsına tâbi‘ Gedikli nâm karyede tavattun ettikden sonra sürekçilik ile mahmiye-i İstanbul’a gelip Yedikule’de hâlik olan Kaba Kondelko v. Dobre nâm zimmînin verâseti li eb er karındaşı Kirço nâm zimmî ve li eb kız karındaşı Rago nâm nasrâniyeye münhasıra olduğu şer‘an sâbit oldukdan sonra mezbûr Kirço asâleten ve mezbûre Rago’nun zevci tarafından husûs-ı âti’l-beyâna vekîli olduğu zikr olunan Kızılağaç kazâsına tâbi‘ Demircili nâm karye ahâlîsinden Ahmed b. Mahmud ve vilâyet-i mezbûrede kasaba-i Karinâbâd’da Câmi‘-i Sagīr mahallesinden Hacı Hüseyin b. Sinan nâm kimesneler şehâdetleriyle şer‘an sâbit olan Yani v. Yanaki nâm zimmî meclis-i şer‘-i şerîf-i lâzımü’t-teşrîfde mahmiye-i mezbûrede beytülmâl-i âmme emîni olup hâlik-i mezbûrun vâris-i ma‘rûfu olmamak zu‘mu ile terekesine vâzı‘ü’l-yed olan umdetü’l-emâcid ve’l-ekârim câmi‘ü’l-mehâmid ve’l-mekârim Mahmud Ağa b. Hasan tarafından husûs-ı câ’i’l-beyâna vekîli olduğu nehc-i şer‘î ve tarîk-i mer‘î üzre şer‘an sâbit olan fahrü’l-akrân Ebûbekir Ağa b. Abdurrahman mahzarında her biri ikrâr ve takrîr-i kelâm edip müvekkil-i mûmâ-ileyhin tereke-i hâlik-i mezbûrdan makbûzu olan yüz sekiz bin akçeyi müvekkil-i müşârün-ileyh Mahmud Ağa yedinden tamâmen ahz u kabz edip tereke-i hâlik-i mezbûra müte‘allika âmme-i de‘âvîden müvekkil-i mûmâ-ileyh ile vekîl-i mezbûru ibrâ-i âmm-ı kātı‘ü’n-nizâ‘ ile ibrâ eyledik dediklerinde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb ve imlâ olundu. Fî selh-i Cumâdelâhire li sene seb‘a ve seb‘a ve elf. Şuhûdü’l-hâl: Edhem Çelebi b. Mustafa, Ahmed Çelebi b. Mahmud, Mustafa b. Kenan, fahrü’l-emsâl Şaban Ağa, Ömer Ağa b. Mustafa.