Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 275 Hüküm no: 276 Orijinal metin no: [61a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saraylı Ayşe Hatun’un eski hizmetkârı Halil b. Kasım’da alacağının olduğu Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ merhûm Ahmed Dede mahallesinde sâkine Ayşe Hâtun bt. Abdullah nâm saraylı meclis-i şer‘-i hatîr-i lâzımü’t-tevkīrde sâbıkan hizmetkârı olan Halil b. Kasım mahzarında üzerine da‘vâ ve takrîr-i kelâm edip işbu orta boylu açık kaşlı Rûsiyyetü’l-asl Zülfikar bt. Abdullah nâm bâkire mülk câriyem bahâsından on altı bin akçe ve Manisalı Yanos nâm zimmî zimmetinde olan dokuz bin akçeden ba‘de küllin üç bin akçe ki cem‘an on dokuz bin akçe hakkım olup hâlâ mezbûr Halil’den taleb eylediğimde teslîmden imtinâ‘ eder suâl olunup alıverilmesi matlûbumdur deyicek gıbbe’s-suâl merkūm Halil cevâbında fi’l-vâki‘ müdde‘iye-i mezbûre Ayşe Hâtun’a minvâl-i muharrer üzre mârrü’z-zikr câriye bahâsından on altı bin akçe ve Manisalı Yanos nâm zimmîden ahz ü kabz eylediğim ba‘de külli hesâb üç bin akçe ki cem‘an on dokuz bin akçe zimmetimde lâzımü’l-edâ ve vâcibü’l-kazâ deynim vardır deyû bi tav‘ihî ikrâr ve i‘tirâf etmeğin ikrârı mûcebince meblağ-ı mezbûr on dokuz bin akçeyi müdde‘iye-i mezbûre Ayşe Hâtun’a edâ ve teslîme merkūm Halil ilzâm olunup mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Ebûbekir Efendi b. Ali el-Kadı, Hamza Efendi nâib-i recül, Mehmed Beşe Çukadâr b. Mustafa, Hüseyin b. Hasan el-Muhzır ve gayruhüm mine’l-hâzırîn.