Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 275 Hüküm no: 277 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe’nin kaçak kölesi Şâhin b. Abdullah’ın mirasçılara ait olduğu Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Zeyneb mahallesinde sâkin iken bundan akdem fevt olan Ahmed Beşe nâm müteveffânın verâseti zevce-i metrûkesi Müferrah bt. Abdullah nâm hâtun ile sulbî sagīr oğlu Mehmed’e munhasıra olduğu şer‘an zâhir ve müte‘ayyin oldukdan sonra mezbûre Müferrah kendi tarafından asâleten ve sadrî oğlu mezbûr Mehmed’in tesviye-i umûru için kıbel-i şer‘den mansûbe vasî olmağla vesâyeten meclis-i şer‘de işbu orta boylu açık kaşlı elâ gözlü Rûsiyyü’l-asl Şâhin b. Abdullah nâm şâbb-ı âbık mahzarında üzerine takrîr-i da‘vâ edip mezbûr Şâhin bundan akdem zevcim müteveffâ-yı mezbûr Ahmed Beşe’nin abd-i memlûkü olup fevt olmazdan bir sene mukaddem müteveffâ-yı mezbûrun mülkünden ibâk etmiş idi. Zevcim müteveffâ-yı mezbûr Ahmed Beşe fevt olmağla mezbûr Şâhin bi’l-irsi’ş-şer‘î bana ve sadrî oğlum mezbûr Mehmed’e isâbet ve intikāl etmişdir hâlâ suâl olunup takrîri tahrîr olunmak bi’l-asâle ve bi’l-vesâye matlûbumdur dedikde gıbbe’s-suâl merkūm Şâhin cevâbında fi’l-hakīka hâl bast ve tahrîr olunduğu minvâl-i muharrer üzre olup ben müdde‘iye-i mezbûrenin zevci müteveffâ-yı merkūm Ahmed Beşe’nin abd-i memlûkü olup fevt olmazdan bir sene mukaddem müteveffâ-yı mezbûrun mülkünden ibâk eylemişimdir hâlâ müteveffâ-yı mezbûr Ahmed Beşe’nin abd-i memlûküyüm deyû rıkkını bi tav‘ihî ikrâr ve i‘tirâf etmeğin mûcebince mevsûf-ı mezbûr Şâhin’in rıkkına ba‘de’l-hükm mâ cerâ bi’l-ibtigā sebt-i imlâ olunup yed-i tâlibe vaz‘ ve i‘tâ olundu. Fi’l-yevmi’s-sânî ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Fahrü’l-müderrisîni’l-kirâm Mustafa Efendi b. el-Hâc Hasan Efendi, Solak Ali Bey b. Halil, Fahrü’l-eimme Hasan Efendi b. Mehmed, çukadâr Ali Beşe, Hüseyin Çelebi b. Hasan, Mehmed Çelebi b. Ahmed ve gayruhüm mine’l-hâzırîn.