Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 276 Hüküm no: 278 Orijinal metin no: [61b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zal Mahmud Paşa Vakfı’na ait odaya eklenen şahnişinin yıkılması Husûs-ı âti’l-beyânın mahallinde tahrîri iltimâs olunmağın savb-ı şerî‘at-ı mutahharadan mevlânâ Eyüb Efendi b. Mehmed irsâl olunup ol dahi hâssa mi‘mârlarından Üstâd Şaban b. Veli ve zeyl-i kitâbda muharrerü’l-esâmî olup ebniye ve sukūf ahvâline vukūf ve şu‘ûru olan cemâ‘at-i müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Zal Mahmud Paşa câmi‘-i şerîfi mukābelesinde yine mûmâ-ileyh Zal Paşa evkāfı’ndan olup câmi‘-i mezbûr imâmına meşrûta olan zikri âtî odaya varılıp evkāf-ı mezbûre mütevellîsi kāimmakāmı olan Arabzâde Mehmed Efendi b. Mehmed mahzarında akd-i meclis-i şer‘-i şerîf olundukda, hâlâ câmi‘-i mezbûrede imâm-ı evvel olup oda-i mezkûrede sâkin olan Ömer Efendi b. ( ) iki tarafdan câr-ı mülâsıkları olan râfi‘ayi’l-kitâb el-Hâc Abdullah Çelebi b. İbrahim el-Müezzin ve Ahmed Bey b. ( ) nâm kimesneler meclis-i ma‘kūd-ı mezkûrda, imâm-ı merkūm Ömer Efendi mahzarında üzerine her biri takrîr-i da‘vâ edip mezbûr Ömer Efendi’nin meşrûtiyyet üzre sâkin ve mutasarrıf olduğu işbu odanın bundan akdem mutasarrıfı olan Mi‘mâr Musli Çelebi işbu üç direk üzerinde mebnî şehnişîni ihdâs edip lâkin mârrü’z-zikr şehnişînin iki tarafında olan pencerelerinin evkāf-ı mezbûreden olup hâlâ bizim sâkin ve mutasarrıf olduğumuz odaların makarr-ı nisvân olan mahallerine havâlesi olmağın havâleni def‘ eyle deyû mukaddemâ mezbûr Ömer Efendi’ye nice def‘a tenbîh eylediğimizde mütenebbih olmamışdır el-hâletü hâzihî müşâhede ve mu‘âyene olunup havâle-i mezkûreyi def‘ etmek üzre merkūm Ömer Efendi’ye kıbel-i şer‘den tenbîh olunmak matlûbumuzdur dediklerinde mi‘mâr-ı mezbûr mahall-i merkūma nazar ve misâha ve takvîm eylediğinde zikr olunan şehnişînin iki tarafında olan pencerelerinin mezbûrân el-Hâc Abdullah Çelebi ve Ahmed Bey’in odalarına havâlesi olduğundan mâ‘adâ mârrü’z-zikr şehnişîn üç zirâ‘ tarîk-i âm üzerinde üç direk üzerine binâ ihdâs olunduğu mukarrer ve muhakkak olmağın minvâl-i muharrer üzre olan şehnişînlerin kal‘ ve ref‘i bâbında emr-i şerîf-i âlîşân vârid olmuşdur, zikr olunan şehnişînin kal‘i lâzımdır deyû mi‘mâr-ı mezbûr haber vermeğin vâki‘ü’l-hâli mevlânâ-yı mezbûr kāimmakām-ı mütevellî olan mezbûr Mehmed Efendi muvâcehesinde mahallinde tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ kayd şüd. Fi’l-yevmi’r-râbi‘ ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Eyüb Çelebi b. Süleyman, Mustafa Çelebi b. Mehmed el-Müezzin, Mehmed b. Mustafa el-Müezzin, İbrahim b. Ahmed, Mustafa b. Abdülkerim, Ahmed Efendi b. İbrahim, Ali b. İbrahim ve gayruhüm mine’l-hâzırîn.