Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 281 Hüküm no: 284 Orijinal metin no: [63a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Düğmecibaşı mahallesinden Ahmed’in vârislerinin miras hisselerini satmaları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Düğmecibaşı mahallesinde sâkin iken bundan akdem vefât eden Ahmed b. ( ) nâm müteveffânın verâseti zevce-i metrûkesi Elif bt. ( ) nâm hâtun ile sulbî kebîr oğlu Mahmud Çelebi’ye ve sulbiye kebîre kızı İsmihan’a munhasıra olduğu şer‘an zâhir ve menzil-i âti’z-zikr beynlerinde iktisâm olundukda, tashîh-i mes’eleleri bi hasebi’l-ferâ’iz yirmi dört sehmden farz ve i‘tibâr olunup sihâm-ı mezkûreden üç sehmi mezbûre Elif’e ve on dört sehmi merkūm Mahmud’a ve yedi sehmi mezbûre İsmihan’a isâbet ve intikāl eylediği müte‘ayyin oldukdan sonra merkūm Mahmud kendi tarafından asâleten ve vâlidesi mezbûre tarafından hisse-i âti’z-zikri bey‘ ve kabz-ı semene vekîl olup Ali b. Abdullah ve Hasan b. Şaban el-ârifân bi zâtihâ bi’l-ma‘rifeti’ş-şer‘iyye şehâdetleri ile vekâleti sâbite olmağın vekâleten meclis-i şer‘de merkūme İsmihan tarafından tasdîke vekîl olan zevc Ahmed Beşe b. Abdullah mahzarında bi’l-asâle ve bi’l-vekâle ikrâr edip mûrisimiz müteveffâ-yı mezbûrun emlâkinden olup mahalle-i mezbûrede vâki‘ bir tarafdan Mercan vakfı ve bir tarafdan Yusuf Bey mülkü ve bir tarafdan câmi‘-i şerîf haremi ve taraf-ı râbi‘i tarîk-i hâs ile mahdûd iki bâb tahtânî oda ve cüneyne-i zât-ı eşcâr-ı müsmire ve gayr-ı müsmire ve kenîfi müştemil mülk-i mevrûsundan bâlâda tahrîr olunduğu üzre ben hissemi asâleten ve vâlidem mezbûrenin hissesini vekâleten mecmû‘-ı menzil-i mezkûr beynimizde on iki bin akçe tahmîn olunmağın sekiz bin beş yüz fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î ile hemşîrem müvekkile-i mezbûreye bi’l-asâle ve bi’l-vekâle bey‘ ve teslîm, ol dahi vech-i muharrer üzre iştirâ ve kabûl edip semeni olan meblağ-ı mezbûr bin beş yüz akçesini vâlidem müvekkile-i mezbûre için ve yedi bin akçesini dahi kendim için hemşîrem mezbûreden tamamen alıp kabz edip menzil-i mezbûrda alâkam kalmadı ba‘de’l-yevm mecmû‘u irsen ve şirâ’en hemşîre-i mezbûrenin mülküdür, keyfe mâ yeşâ’ mutasarrıfe olsun dedikde gıbbe’t-tasdîki’l-mu‘teber, mâ hüve’l-vâki‘ bi’t-taleb ketb olundu. Fî selh-i Şevvâli’l-mükerrem li sene isneteyn ve seb‘în ve elf. Şuhûdü’l-hâl: Mustafa Efendi el-İmâm, Mehmed Çelebi el-Müezzin, Halil Çelebi b. Haydar, Mahmud Efendi b. ( ) el-Hatîb, Ali Bey b. Mehmed ve gayruhüm mine’l-hâzırîn.