Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 281 Hüküm no: 285 Orijinal metin no: [63a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Bey b. Hacı Pîrî’nin terekesinin hak sahiplerine verilmesi Vilâyet-i Anadolu’da nefs-i kasaba-i Bor’dan işbu râfi‘ayi’l-kitâb Ali Bey b. Hüdâverdi nâm cündî ile Osman b. Mustafa nâm kimesne meclis-i şer‘de medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Mehmed Bey mahallesinde sâkine olup sagīre sadriye kızı Fâtıma’nın tesviye-i umûru için kıbel-i şer‘den mansûb vasî olan Ümmühâni bt. Hızır nâm hâtun mahzarında üzerine her biri takrîr-i da‘vâ edip mezbûre Ümmühâni’nin zevci olup bundan akdem vefât eden Veli Bey b. el-Hâc Pîrî bizim babamız Hüdâverdi ve Mustafa ile li ebeveyn karındaşlar olup mezbûr Veli Bey fevt olmağın verâseti zevcesi mezbûre Ümmühâni ile sulbî mürâhık oğlu Mustafa nâm mecnûna ve sulbiye kebîre kızı Ayşe ve âhar sagīre kızı Fâtıma’ya munhasıra olup kable’l-kısme mecnûn-ı mezbûr Mustafa dahi fevt olmağın verâseti vâlidesi mezbûre Ümmühâni ile li ebeveyn hemşîreleri mezbûretân Ayşe ve Fâtıma’ya ve li ebeveyn ammileri oğulları olduğumuz ecilden bize munhasıra olmuş iken, mezbûre Ümmühâni müteveffâ-yı evvel mezbûr Veli Bey’in mecmû‘-ı muhallefâtına vaz‘-ı yed edip bi hasebi’l-ferâ’iz ve bi hükmi’l-münâsahati’ş-şer‘iyye irsen bize isâbet ve intikāl eden hisse-i şer‘iyye-i şâyi‘alarımızı teslîmden imtinâ‘ eder hâlâ suâl olunup müteveffâ-yı evvel ammimiz merkūm Veli Bey’den oğlu müteveffâ-yı sânî mecnûn-ı merkūm Mustafa’ya irsen isâbet ve intikāl eden hisse-i şer‘iyyesinden bize âid olan hisse-i şer‘iyyelerimizin alıverilmesi matlûbumuzdur dediklerinde gıbbe’s-suâl mezbûre Ümmühâni zevci müteveffâ-yı mezbûrun mecmû‘-ı muhallefâtına vaz‘-ı yedini ikrâr, lâkin müdde‘iyân-ı mezbûrânın vech-i muharrer üzre verâsetlerini inkâr ile cevâb vermeğin müdde‘iyân-ı mezbûrândan müdde‘âlarını mübeyyine beyyine taleb olundukda, udûl-i ricâlden olup fi’l-asl Ulukışla’dan ve hâlâ mahmiye-i İstanbul’da Kumkapı’da Nişancı Paşa mahallesinde sâkin Ebûbekir Beşe b. İbrahim nâm râcil ile Top arabacıları zümresinden Mustafa b. Halil nâm kimesneler li ecli’ş-şehâde makām-ı kazâya hâzırân olup isre’l-istişhâd fi’l-hakīka müteveffâ-yı evvel-i merkūm Veli Bey ile müdde‘iyân-ı mezbûrânın babaları mezbûrân Hüdâverdi ve Mustafa li ebeveyn karındaşlardır, zirâ‘ babaları ismi el-Hâc Pîrî ve anaları ismi Gülpîşe demekle meşhûr Ayşe nâm hâtundur, maskat-ı re’sleri mârrü’z-zikr Bor kasabası a‘mâlinden Ulukışla nâm mahaldir, biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın müdde‘iyân-ı mezbûrânın verâsetlerini ba‘de’l-hükm müteveffâ-yı sânî mecnûn-ı mezbûr Mustafa’ya babası müteveffâ-yı evvel merkūm Veli Bey’den isâbet ve intikāl eden hisse-i şer‘iyyesinden müdde‘iyân-ı mezbûrâna bi hükmi’l-münâsahati’ş-şer‘iyye hisselerini edâ ve teslîme muhallefât-ı müteveffâ-yı mezbûra vâzı‘ü’l-yed olan mezbûre Ümmühâni’ye tenbîh-i şer‘î olunup mâ cerâ kayd şüd. Fî 20 min Şevvâl sene 1072. Şuhûdü’l-hâl: Ali Beşe b. Emrullah, Ahmed Ağa b. Zünnun, Mehmed Efendi b. Mehmed el-Kadı, Mehmed b. Mahmud, Hasan b. Abdullah, Hüseyin b. ( ) Muhzır ve gayruhüm.