Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 283 Hüküm no: 286 Orijinal metin no: [63b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Beşe b. Hasan’ın evini bey‘ bi’l-istiğlâl yoluyla Mehmed Bey Mahallesi Avârızı Vakfı’na satması Medîne-i Hazret-i Ebâ Eyyûb’da vâki‘ Davud Ağa mahallesinde sâkin Mahmud Beşe b. Hasan mahfil-i şer‘de yine medîne-i mezbûrede vâki‘ Mehmed Bey mahallesi avârızına mevkūfe olan nukūda bi’l-fi‘l mütevellî olan Mehmed Çelebi b. Hasan mahzarında ikrâr ve takrîr-i kelâm edip emlâkimden olup mahalle-i mezbûrede vâki‘ bir tarafdan mekābir-i müslimîn ve bir tarafdan Ayşe Hâtun mülkü ve taraf-ı âharı tarîk-i âm ile mahdûd mülk menzilimi cümle tevâbi‘ ve levâhıkı ile mütevellî-i mezbûra alâ tarîki’l-istiğlâl kırk dokuz riyâlî kebîr guruşa beher guruşu yedişer dirhem olmak üzre dört bin nakd-i râyic fi’l-vakt akçeye bey‘ ve teslîm eylediğimde ol dahi minvâl-i mübeyyen üzre mâl-ı vakf-ı mezbûr ile iştirâ ve tesellüm ve kabz ve kabûl eyleyip semeni olan meblağ-ı mezbûru mütevellî-i mûmâ-ileyh yedinden tamamen alıp kabz eylediğimden sonra yine menzil-i mahdûd-ı mezkûru ba‘de’t-tahliyyeti’ş-şer‘iyye üç sene tamâmına değin beher senesi altışar yüz akçeden sinîn-i mezbûrda cem‘an bin sekiz yüz akçe icâre ile bana îcâr ve teslîm edip ben dahi minvâl-i meşrûh üzre istîcâr ve tesellüm ve kabz ve kabûl eyledim dedikde gıbbe’t-tasdîki’ş-şer‘î, mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şevvâl li sene isneteyn ve seb‘în ve elf. Şuhûdü’l-hâl: Mustafa Efendi b. Mehmed, diğer Mustafa Çelebi b. Abdullah, Tursi?