Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 286 Hüküm no: 290 Orijinal metin no: [64a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eyüb karakolunun çorbacısı Mehmed Çavuş’un bir eve girip içindekileri korkutan şahısları tekrar bulup mahkemeye getirmesi gerektiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Düğmecibaşı mahallesi sâkinelerinden Fâtıma bt. Cafer nâm hâtun kıbelinden husûs-ı âti’z-zikre vekîl olan vâlidesi Emine bt. Mehmed nâm hâtun meclis-i şer‘de medîne-i mezbûr kolluğunda hâlâ çorbacı olan Mehmed Çavuş mahzarında üzerine bi’l-vekâle takrîr-i da‘vâ edip târih-i kitâbdan bir gün mukaddem vakt-i asrda ben ve sadriye kebîre kızım müvekkile-i mezbûre oğlum hâzır bi’l-meclis Murtaza b. Şaban mahalle-i mezbûrede vâki‘ mülk menzilimde kendi hâlimizde otururken, gāib ani’l-meclis isimleri nâ-ma‘lûm beş nefer orta kuşaklı sarhoş kimesneler ellerinde hançerleriyle bir avratı kovarak bizim menzilimize düşürüp her biri içeri girip üzerimize hücûm eylediklerinde biz dahi feryâd eyledikde zâbit-i merkūm Mehmed Çavuş kıbel-i şer‘den nâib ve medîne-i mezbûre subaşısı ve yasakçılarıyla gelip merkūmûn sarhoşları ahz etmiş iken, kable ihzâri’ş-şer‘ ıtlâk murâd eylediğinde kızım müvekkile-i mezbûre ben beş aylık hâmil idim, hâlâ havfımdan belim boşanmışdır sakt ihtimâli vardır merkūmûnu salıverme dediğinde merkūm Mehmed Çavuş ben merkūmûna kefîlim her-bâr ki taleb edesin meclis-i şer‘a ihzâr ederim deyû kefîl olmuş idi el-hâletü hâzihî merkūm Mehmed Çavuş’dan suâl olunup takrîr tahrîr olunmak bi’l-vekâle matlûbumdur deyicek gıbbe’s-suâl merkūm Mehmed Çavuş cevâbında fi’l-vâki‘ merkūmûn müdde‘iye-i mezbûrenin menziline girip ben dahi varıp ahz eylediğimde merkūmûnun sarhoşluklarından nâşî bir fesâd olur deyû havfımdan kefîl olmuşdum, her birisini bulup ihzâr-ı şer‘-i şerîf edeyim deyicek vâki‘ü’l-hâl hıfzan li’l-makāl vekîl-i mezbûr talebiyle ketb olundu. Fi’l-yevmi’s-sânî min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Seyfullah Ağa b. Ramazan, es-Seyyid Ali Efendi imâm-ı hazret-i Mehmed Paşa, Hamza Efendi nâib-i recül, Ali Beşe Çukadâr ve gayruhüm mine’l-hâzırîn.