Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 286 Hüküm no: 291 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ogas v. Ferharad’ın mühtedi Ali’nin oğlu Mehmed Şahbaz’a tecavüz ederken yakalandığı Mahmiye-i İstanbul hısnı ebvâbından Balatkapısı dâhilinde sâkin Ali [b.] Abdullah nâm mühtedî Ogas v. Ferharad nâm Ermeni’yi meclis-i şer‘a medîne-i Hazret-i Ebâ Eyyûb el-Ensârî subaşısı Seyfullah Ağa mübâşeretiyle ihzâr ve muvâcehesinde üzerine takrîr-i da‘vâ edip işbu târih-i kitâbdan bir gün mukaddem kıbel-i? mağribde merkūm Ogas sagīr oğlum hâzır bi’l-meclis Mehmed Şahbaz nâm sagīri medîne-i mezbûrede Çömlekçiler kurbunda Tokmaktepe demekle ma‘rûf mekābir-i müslimînde bir ağaç dibinde fi‘l-i şenî‘ ederken Defterdâr iskelesini bekleyen yasakçı ve bir müslüman dahi rast gelip merkūm Ogas’ı oğlum sagīr-i mezbûrun üzerinden kaldırıp zâbit-i merkūma teslîm eylemişlerdir hâlâ suâl olunup ihkāk-ı hak olunmak matlûbumdur deyicek gıbbe’s-suâl ve’l-inkâr ve isre talebi’l-beyyine udûl-i ricâlden Otakçıbaşı mahallesinde sâkin Mahmud b. Osman nâm kimesne ile mârrü’z-zikr Defterdâr iskelesini bekleyen Osman Beşe b. Ahmed nâm râcil li ecli’ş-şehâde makām-ı kazâya hâzırân olup istişhâd olunduklarında, fi’l-vâki‘ târih-i mezbûrda ve vakt-i merkūmda mersûm Ogas sagīr-i merkūmu mârrü’z-zikr Tokmaktepe bir ağaç dibinde yatırıp fi‘l-i şenî‘ ederken biz rast gelip merkūm Ogas’ı sagīr-i mezbûrun üzerinden kaldırıp zâbit-i merkūma teslîm eylemişizdir, biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın yemîn billâh [etmeğin kayd şüd]. Fî 2 min Zilka‘de sene 1072. Şuhûdü’l-hâl: Ömer Beşe b. Memi, Eyüb Çelebi b. Mehmed, Mustafa b. İbrahim, Mehmed Çelebi b. [R]ıdvan, Hamza Efendi nâib-i recül, Hüseyin Çelebi b. Tayyib, Hüseyin Muhzır, Sâlih Mehmed Efendi b. Mehmed, Murtaza b. Şaban ve gayruhüm.