Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 287 Hüküm no: 292 Orijinal metin no: [64b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Petro v. Nikola’nın evini Nazperver Hatun para vakfına bey‘ bi’l-istiğlâl yoluyla satması Dârü’l-hilâfeti’l-aliyye Kostantıniyye el-mahmiyye hısnı ebvâbından Fenerkapısı dâhilinde Abdi Subaşı mahallesinde sâkin Petro v. Nikola nâm zimmî meclis-i şer‘de medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Nazperver Hâtun vakf eylediği nukūda bi’l-fi‘l mütevellî olan râfi‘ü’l-kitâb Davud Efendi b. Mehmed nâm mütevellî mahzarında ikrâr ve takrîr-i kelâm edip silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan Zafiri mülkü ve bir tarafdan Laskari mülkü ve bir tarafdan cidâr-ı hısn ve taraf-ı râbi‘i tarîk-i âm ile mahdûd mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık on bin nakd-i râyic fi’l-vakt akçeye mütevellî-i mezbûra alâ tarîki’l-istiğlâl bey‘ edip ol dahi minvâl-i [muharrer üzre] mâl-ı vakf-ı mezbûr ile tarîk-i merkūm üzre iştirâ edip kabz-ı semen-i ma‘dûd ve teslîm-i mebî‘-i mahdûd kıldığımdan sonra yine menzil-i mahdû[d]-ı mezkûru ba‘de’t-tahliyye ve’t-tekābuz târih-i kitâb şehri gurresinden her senesi bin beş yüz akçeden üç sene tamâmına değin dört bin beş yüz akçe icâre ile bana îcâr ve teslîm, ben dahi vech-i mübeyyen üzre istîcâr ve tesellüm ve kabz ve kabûl eyledim dedikde gıbbe’t-tasdîki’l-mu‘teber yine mahalle-i mezbûre sükkânından Drako v. Ergiri ve Yanaki v. Manol nâm zimmîler meclis-i mezbûrda zikr olunan on bin akçe mâl-ı vakf-ı mezbûru ve her sene icâre-i menzil bin beş yüz akçeyi mütevellî-i mezbûra edâ ve teslîme emr u kabûlü hâvî kefâlet-i sahîh-i şer‘iyye ile kefîl olduklarında, men lehü’t-tasdîk kıbelinden ba‘de’l-kabûl mâ cerâ bi’t-taleb ketb olundu. Fi’l-yevmi’s-sânî min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Eyüb Çelebi b. Mehmed, Ali Çelebi b. Mehmed na‘thân, Nasuh Halîfe b. Abdüsselâm, el-Hâc Mustafa b. Şaban ve gayruhüm mine’l-hâzırîn.