Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 288 Hüküm no: 293 Orijinal metin no: [64b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in daha önceden Sefer b. Mehmed’den boşanmış olduğu Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Nişancı Paşa mahallesinde sâkine Ayşe bt. Mehmed nâm hâtun meclis-i şer‘-i hatîrü’l-lâzımi’t-tevkīrde sâbıkan zevci olan Sefer b. Mehmed nâm kimesne mahzarında üzerine takrîr-i da‘vâ edip târih-i kitâbdan üç ay mukaddem zevcim mezbûra bir töhmet isnâd olunmağın firâr etmekle bir gece ba‘de’l-işâ benim menzilime gelip ben dahi ben mehr-i müeccelimden ve nafaka ve iddet ve me’ûnet-i süknâmdan fâriğa oldum, sen dahi beni tatlîk edip başını halâs eyle dediğimde zevcim mezbûr dahi beni minvâl-i muharrer üzre beni tatlîk etmişiken hâlâ gelip yine benim ile zevciyyet mu‘âmelesi etmek murâd eder suâl olunup men‘ ve def‘ olunmak matlûbumdur deyicek gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda, mahalle-i mezbûrede sâkin udûl-i ricâlden Mehmed b. Ahmed nâm kimesne ile Nişancı Paşa mahallesi sâkinlerinden Mustafa b. Mehmed nâm râcil li ecli’ş-şehâde makām-ı kazâya hâzırân olup istişhâd olunduklarında, fi’l-hakīka târih-i kitâbdan üç ay mukaddem mezbûr Sefer firâr etmiş iken, bir gece menziline [65a] gelip zevcesi müdde‘iye-i mezbûre dahi mehr-i müeccelimden ve nafaka-i iddet ve me’ûnet-i süknâmdan fâriğa oldum, sen dahi beni tatlîk edip başını halâs eyle dediğinde mezbûr Sefer dahi râzı olmağın mezbûre Ayşe bizi da‘vet edip huzûrumuzda âgâze-i kelâm eylediğinde biz dahi fi’l-hakīka mezbûr mehr-i müeccelinden ve nafaka-i iddet ve me’ûnet-i süknâsından fâriğa oldukdan sonra sen dahi mezbûreden fâriğa olup başını halâs eyle dediğimizde mezbûr Sefer dahi râzı olup huzûrumuzda mezbûreden fâriğa olup gitmişdir biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mezbûr Sefer bilâ tecdîdi’n-nikâh mezbûreye zevciyyet mu‘âmelesi etmek men‘ birle mâ hüve’l-vâki‘ kayd şüd. Fi’l-yevmi’s-sânî min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Umdetü’l-kuzâti’l-İslâm Tefsîrî Mehmed Efendi, Ömer Efendi b. Mehmed el-Kadı, Hamza Efendi el-Kadı, Musli Bey b. Abdullah ve gayruhüm mine’l-hâzırîn.