Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 289 Hüküm no: 294 Orijinal metin no: [65a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mustafa b. Abdülbâki’nin vârislerinin miras evlerini Mustafa Bey’e satmaları Medîne-i Hazret-i Ebâ Eyyûb el-Ensârî -aleyhi rıdvânü’l-Bârî-’de Nazperver mahallesinde sâkin iken bundan akdem vefât eden el-Hâc Mustafa b. Abdülbâkī nâm müteveffânın verâseti, zevce-i metrûkesi Fâtıma bt. Ramazan ile âhar zevcesinden mütevellîde sulbiye kebîre kızı diğer Fâtıma ve sulbî sagīr oğlu Mehmed ve sulbiye kebîre kızları Âlime ve Afîfe’ye munhasıra olduğu şer‘an zâhir ve bi hasebi’l-ferâ’iz tashîh-i mes’eleleri kırk sehmden farz ve i‘tibâr olunup sihâm-ı mezbûreden beş sehmi mezbûre Fâtıma’ya ve yedişer sehmi kızları mezbûrât diğer Fâtıma ve Âlime ve Afîfe ve on dört sehmi oğlu sagīr-i mezbûr Mehmed’e isâbet ve intikāl eylediği müte‘ayyin ve mütehakkik olmağın müteveffâ-yı mezbûrun mahalle-i mezbûrede vâki‘ lede’l-ahâlî ve’l-cîrân ma‘lûmetü’l-hudûd mülk menzili beynlerinde ber minvâl-i muharrer iktisâm olundukdan sonra sagīr-i mezbûre Mehmed dahi fevt olup verâseti vâlidesi mezbûre Fâtıma ile li ebeveyn kız karındaşları merkūmetân Âlime ve Afîfe’ye munhasıra olup bi hasebi’l-ferâ’iz mes’eleleri sihâmlarından kılınmağla beş sehm farz ve i‘tibâr olunup sihâm-ı mezkûreden bir sehmi vâlidesi mezbûre Fâtıma’ya ve ikişer sehmi mezbûretân Âlime ve Afîfe’ye irsen isâbet ve intikāl etmeğin mezbûrât Fâtıma ve Âlime ve Afîfe meclis-i şer‘-i hatîr-i lâzımü’t-tevkīrde işbu sâhibü’l-kitâb fahrü’l-akrân Mustafa Bey b. ( ) nâm cündî mahzarında her biri bi tav‘ihâ ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimizde münselik olup mahalle-i mezbûrede vâki‘ bir tarafdan müşterî-i mezbûr mülkü ve bir tarafdan diğer Mustafa Bey mülkü ve bir tarafdan Veli Bey mülkü ve bir tarafdan tarîk-i hâs ile mahdûd iki bâb fevkānî oda ve altında bir matbah ve zât-ı eşcâr-ı müsmire ve gayr-ı müsmire bahçe ve kenîfi müştemil mülk-i mevrûs menzilimizi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık on dokuz bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile her birimiz bâlâda zikr olunan hisselerimizi bey‘ ve teslîm eylediğimizde ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t on dokuz bin akçeyi tamamen müşterî-i mezbûr yedinden alıp kabz edip menzil-i mahdûd-ı mezkûrda vechen mine’l-vücûh alâka ve medhalimiz kalmadı müşterî-i mezbûr Mustafa Bey’in mülk-i müşterâsı ve hakk-ı sarîhidir, keyfe mâ yeşâ’ mutasarrıf olsun dediklerinde gıbbe’t-tasdîki’ş-şer‘iyyi’l-vicâhiyyi’l-mu‘teber, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Davud Efendi b. Mehmed imâm-ı mahalle-i mezbûre, el-Hâc Mustafa müezzin-i mahalle-i mezbûre, Receb Efendi imâm-ı mahalle-i Takyeci, Mehmed Çelebi b. eş-Şeyh Hızır, Kaytas Bey b. Abdullah el-Cündî, Ahmed Efendi el-Mu‘temed, Yusuf Bey el-Cündî, es-Seyyid Ahmed Efendi el-Müderris, Osman Ağa b. Mustafa, Mustafa Bey b. Abdullah, Ali b. İsmail, Ramazan el-Attâr, Ali Beşe Çukadâr ve gayruhüm mine’l-hâzırîn.