Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 290 Hüküm no: 295 Orijinal metin no: [65a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Abdullah’ın evini Ahmed Çelebi para vakfına bey‘ bi’l-istiğlâl yoluyla satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Nazperver mahallesinde sâkin fahrü’l-akrân Mustafa Bey b. Abdullah nâm kimesne meclis-i şer‘de Âsım Ahmed Çelebi vakf eylediği nukūda bi’l-fi‘l mütevellî olan râfi‘ü’l-kitâb Davud Efendi b. Mehmed mahzarında ikrâr ve takrîr-i kelâm edip emlâkimden olup mahalle-i mezbûrede vâki‘ bir tarafdan yine âhar mülküm ve bir tarafdan diğer Mustafa Bey mülkü ve bir tarafdan Veli Bey mülkü ve taraf-ı âharı tarîk-i hâs ile mahdûd olan mülk menzilimi cümle tevâbi‘ ve levâhıkı ile mütevellî-i mezbûr Davud Efendi’ye her bir guruşu yedişer dirhem olmak üzre bi tarîki’l-istiğlâl yüz yirmi beş kıt‘a riyâlî guruşa bey‘ ve teslîm edip ol dahi mâl-ı vakf-ı mezbûr ile minvâl-i muharrer üzre iştirâ ve tesellüm ve kabz ve kabûl eyleyip semeni olan mezbûrü’n-na‘t yüz yirmi beş kıt‘a riyâlî kebîr guruşu yedinden tamamen alıp kabz eylediğimden sonra yine menzil-i mahdûd-ı mezkûru ba‘de’t-tahliyyeti’ş-şer‘iyye târih-i kitâbdan bir sene tamâmına değin her bir guruşu yedişer dirhem olmak hesâbınca on sekiz kıt‘a bir riyâlî kebîr guruş ile seksen iki hurda akçe ücret ile bana îcâr ve teslîm, ben dahi vech-i meşrûh üzre istîcâr ve tesellüm ve kabz ve kabûl eyledim deyicek gıbbe’t-tasdîki’ş-şer‘iyyi’l-mu‘teber mâ cerâ kayd şüd. Fi’l-yevmi’r-râbi‘ min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: El-Hâc Mustafa Halîfe el-Müezzin, Receb Efendi el-İmâm, Mehmed Çelebi b. eş-Şeyh Hızır, Kaytas Bey b. Abdullah, Yusuf Bey el-Cündî, Osman Ağa b. Mustafa, Ali Çelebi b. İsmail, Hızır b. ( ), Mehmed Muhzır, es-Seyyid Ahmed Efendi Müderris, çukadâr Ali Beşe ve gayruhüm mine’l-hâzırîn.