Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 291 Hüküm no: 296 Orijinal metin no: [65b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dellâl Ali Dede b. Hasan’ın hanımı Cennet bt. Mustafa’ya mehir borcu olup herhangi bir malı bulunmadığını kaydettirmesi Belde-i mübâreke-i Hâlidiyye medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Şahsultan mahallesinde sâkin dellâl Ali Dede b. Hasan nâm kimesne meclis-i şer‘-i hatîr-i lâzımü’t-tevkīrde zevcesi işbu hâmiletü’l-kitâb Cennet bt. Mustafa nâm hâtun mahzarında ikrâr ve takrîr-i kelâm edip zimmetimde zevcem mezbûre Cennet’in altı yüz elli akçe mehr-i müecceli olup benim ise lâbis olduğum esvâbımdan gayrı kalîl [u] kesîr u celîl ve hakīr ism-i mâl ıtlâk olunur bir şeyim yokdur küllü nefsin zâ’ikatü’l-mevt ve küllü hayyin yülâkīhi’l-fevt fehvâsı üzre ben işbu dâr-ı dünyâdan sarây-ı ukbâya intikāl ve irtihâl eylediğimde beytülmâl kıbelinden zevcem mezbûre Cennet, zevcinin muhallefâtını ketm ve hıfz eyledin deyû rencîde ve remîde olunmasın dedikde vâki‘ü’l-hâl bi’t-taleb ketb olundu. Fi’l-yevmi’l-hâmis min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Fahrü’l-kuzât Mustafa Efendi b. el-Hâc Receb, Ahmed Efendi b. ( ) el-Müezzin, İsmail Çelebi b. Resul, es-Seyyid Mehmed Çelebi b. es-Seyyid Ebûbekir, Ali Çelebi el-Kayyım, el-Hâc Mahmud b. Ahmed el-Cündî, Süleyman Çelebi b. Davud, Halil Çelebi b. el-Cündî, İbrahim Çelebi b. Yakub, Halil Beşe b. ( ) ve gayruhüm mine’l-hâzırîn.