Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 292 Hüküm no: 298 Orijinal metin no: [65b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hatun bt. Ahmed’in câriyesi Timurhan bt. Abdullah’ı âzat etmesi Mehbitü’l-envâr makarrü’l-ebrâr medîne-i Hâlidiyye-i mübâreke -humiyet ahâlîhâ ani’l-fiten ve’l-beliyye- mahallâtından Davud Ağa mahallesinde sâkine Ayşe Hâtun bt. Ahmed tarafından ıtk ve tahrîr-i câ’i’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân olan Nasuh Halîfe b. Abdüsselâm ve Mahmud Çelebi b. Ali şehâdetleriyle şer‘an vekâleti sâbite olan zevci Mustafa Çelebi b. Ramazan meclis-i şer‘-i şerîfde zevcesi müvekkile-i mezbûreye rıkk-ı sâbıkını mu‘terife orta boylu açık kaşlı elâ gözlü üst dişleri iri sarışın burnu kerteles Rûsiyyetü’l-asl sâhibetü’l-kitâb Timurhan bt. Abdullah nâm câriye-i memlûkesi mahzarında bi’l-vekâle ikrâr ve takrîr-i kelâm edip ıtk-ı rakabât a‘zam-ı kurebât olup mu‘takın ıtkı mukābelesinde mu‘tıkın cemî‘ uzvu nârdan âzâd olduğunu nâtık hadîs-i şerîfin mefhûm-ı latîfine ıttılâ‘ı olmağın câriye-i memlûkesi mevsûfe-i mezkûreyi hasbeten lillâhi te‘âlâ cemî‘ malından ifrâz ve i‘tâk ve tahrîr ve zümre-i harâir-i asliyyâta ilhâk ve idrâc edip üzerinde hakk-ı velâdan gayrı hakkım kalmadı ba‘de’l-yevm sâir harâir-i asliyyât gibi hürre olsun dedi dedikde hâkim-i muvakki‘-i sadr-ı kitâb hazretleri kıbelinden sıhhat-i ıtk-ı mezkûra hükm birle mâ hüve’l-vâki‘ kayd şüd. Fi’l-yevmi’s-sâdis min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Abdülkādir Çelebi b. Yusuf, Şaban Çelebi b. Mustafa, Yusuf Çelebi el-Mu‘allim, Süleyman b. Mustafa, Halil b. Mustafa, Hamza Efendi el-Kadı, Hüseyin el-Muhzır, Mehmed Beşe b. Musli ve gayruhüm mine’l-hâzırîn.