Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 292 Hüküm no: 299 Orijinal metin no: [66a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad Beşe b. Abdullah’ın Otakçıbaşı mahallesi para vakfına borçlu olduğu Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Otakçıbaşı mahallesi imâmı olup mahalle-i mezbûrenin nukūd-ı mevkūfe-i müteferrikasına bi’l-fi‘l mütevellî olan fahrü’l-eimme Mehmed Efendi b. Sefer nâm kimesne meclis-i şer‘de Murad Beşe b. Abdullah nâm râcil mahzarında üzerine bi’t-tevliyye takrîr-i da‘vâ edip mâl-ı vakf-ı mezbûrdan bundan [akdem] babam müteveffâ-yı mezbûr Sefer mütevellî iken mezbûr Murad Beşe iki bin râyic fi’l-vakt akçe istirbâh ve kabz edip hâlâ taleb eylediğimde bin akçesini edâya râzı ve bin akçesini edâda te‘allül eder suâl olunup mâl-ı vakf-ı mezbûr iki bin akçenin alıverilmesi matlûbumdur deyicek gıbbe’s-suâl mezbûr Murad Beşe cevâbında fi’l-vâki‘ müdde‘î-i mezbûrun babası mezbûr Sefer mütevellî iken vech-i muharrer üzre mâl-ı vakf-ı mezbûrdan iki bin akçe istirbâh ve kabz eylemişdim lâkin mezbûr Sefer’in hâl-i hayâtında iki câriyesi firâr edip Büyük Hâslar karyelerinden bu karyede ahz olunup mezbûra haber verdiklerinde mezbûr Sefer dahi ol câriyelerin müjdegânesi için âhize bin akçe ver deyû bana emr etmişidi, ben dahi zimmetimde olan iki bin akçenin bin akçesini emri üzre ol câriyeleri âhizine huzûr-ı müslimînde emri üzre edâ ve teslîm eylemişimdir deyicek isre’l-istintâk mütevellî-i mezbûr Mehmed Çelebi cevâbında mezbûr Murad Beşe babam müteveffâ-yı mezbûrun emriyle ol câriyelerin müjdesi için bin akçe verdiği ma‘lûmum değildir, ikrârı üzre mâl-ı vakfı edâ eylesin ba‘dehû babam müteveffâ-yı mezbûrun emrini ve minvâl-i muharrer üzre bin akçe verdiğini isbât ederse muhallefâtından alsın deyicek alâ mûcebi ikrârihî iki bin akçe mâl-ı vakfı mütevellî-i mezbûra edâ ve teslîm ile merkūm Murad Beşe ilzâm olunup mâ hüve’l-vâki‘ bi’t-taleb kayd şüd. Fi’l-yevmi’l-hâmis min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Mehmed Bey b. Abdullah, diğer Mehmed b. Abdullah, Ali Beşe Çukadâr, Sâlih Mehmed Efendi b. Mehmed ve gayruhüm mine’l-hâzırîn.