Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 293 Hüküm no: 300 Orijinal metin no: [66a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Ahmed Çelebi Vakfı’na vakfın câbisi Ramazan Çelebi b. Abdullah’ın borçlu olduğu Tahakkuk-ı özr-i şer‘î ile da‘vâ-yı âti’z-zikri mahallinde istimâ‘ ve tahrîr için bi’t-taleb irsâl olunan mevlânâ Sâlih Mehmed Efendi b. Mehmed, zeyl-i kitâbda muharrerü’l-esâmî olan müslimîn ile Havâss-ı Kostantıniyye el-mahmiyye kazâsı a‘mâlinden Hasköy’de Kiremitçi Ahmed Çelebi mahallesinde sâkin olup hâlâ marîz ve sâhib-firâş olmağla meclis-i şer‘a huzûru müte‘azzir olan Ramazan Çelebi b. Abdullah’ın menziline varılıp akd-i meclis-i şer‘-i şerîf eylediğinde yine mezbûr Kiremitçi Ahmed Çelebi evlâdının evlâd-ı evlâdından olup meşrûtiyyet üzre evkāfına bi’l-fi‘l mütevellî olan sâhibü’l-kitâb Mehmed Çavuş b. Ebûbekir meclis-i ma‘kūd-ı mezkûrda, evkāf-ı mezbûrenin hâlâ câbîsi olan merkūm Ramazan Çelebi mahzarında bi’l-velâye üzerine takrîr-i da‘vâ edip evkāf-ı mezbûreden olup mukaddemâ icâre-i mu‘accele ve müeccele-i ma‘lûmeteyn ile bundan akdem bilâ-veled fevt olan Sâlih Efendi merhûm uhdesinde olan kiremithâne hissesini, ben diyâr-ı âharda iken evkāf-ı mezbûre kâtibi Mehmed Efendi sâbıkan Kethüdâ Bey olan Süleyman Paşa’ya iki yüz elli bin akçe icâre-i mu‘accele ve ücret-i müeccele-i ma‘lûme ile îcâr ve meblağ-ı mezbûru vakf için kabz eylediğinden sonra câbî-i mezbûr Ramazan meblağ-ı mezbûrun otuz bin akçesini ücret-i cibâyet ve müjdegâne ve dellâliyye ve zevcem vâkıfın evlâdındandır deyû fuzûlen alıp kabz etmeğin ben dahi tevliyyetim hasebiyle meblağ-ı mezbûru câbî-i merkūmdan da‘vâ ve vakf için taleb eylediğimde ol dahi huzûr-ı hâkimde ikrâr etmekle meblağ-ı mezbûrun edâsına hükm-i hâkim-i lâhık olup yedime hüccet-i şer‘iyye verilmeğin meblağ-ı mezbûrun on altı bin beş yüz akçesini mukaddemâ câbî-i mezbûr Ramazan Çelebi’den vakf için tevliyyetim hasebiyle alıp kabz edip bâkī on üç bin beş yüz akçesini dahi taleb eylediğimde teslîmden imtinâ‘ eder hâlâ suâl olunup meblağ-ı bâkī olan on üç bin beş yüz akçenin vakf için alıverilmesi murâdımdır deyicek gıbbe’s-suâl câbî-i mezbûr Ramazan Çelebi cevâbında fi’l-hakīka hâl mütevellî-i mezbûrun bast ve takrîr eylediği minvâl üzre olmuşidi, meblağ-ı bâkī on üç bin beş yüz akçeyi müjdegâne ve dellâliyye ve cibâyetim için alıkoyup evlâd-ı vâkıfdan olan oğullarımın hitân cem‘iyyetine harc ve sarf eyledim deyû meblağ-ı mezbûr on üç bin beş yüz akçe zimmetinde bâkī kaldığını bi tav‘ihî ikrâr ve i‘tirâf etmeğin alâ mûcebi ikrârihî meblağ-ı mezbûru vakf-ı mezbûr için mütevellî-i merkūma edâ ve teslîme mezbûr Ramazan Çelebi’ye mevlânâ-yı mezbûr mahallinde tenbîh ve vâki‘ hâli alâ vukū‘ihî tahrîr, ba‘dehû meclis-i şer‘a ma‘an irsâl olunan Hasköy nâibi Mustafa Efendi ve Çukadâr Ali Beşe ile gelip alâ vukū‘ihî inhâ ve takrîr eylediklerinde mâ cerâ bi’l-ibtigā kayd şüd. Fi’l-yevmi’r-râbi‘ min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: es-Seyyid Mustafa Efendi el-Hammâmî, Mustafa Ağa b. Sinan el-Mu‘allim, Mehmed Efendi b. Mustafa, Ali Bey el-Hallâk, Ali Beşe b. Emrullah, Ali Efendi imâm-ı mahalle-i Turşucuzâde, es-Seyyid Mehmed Çelebi b. es-Seyyid Mustafa, Dilâver b. Abdullah el-Muhzır ve gayruhüm mine’l-hâzırîn.