Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 303 Hüküm no: 342 Orijinal metin no: [44b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Ali’nin, İmâmzâde Abdülkādir Efendi’nin kölesi Yuvan’ın taş ile dişlerini kırdığı Mahmiye-i İstanbul’da Canbâziye mahallesi sükkânından umdetü’l-müderrisîni’l-kirâm İmâmzâde Abdülkādir Efendi tarafından husûs-ı âti’l-beyâna vekîl olduğu Mehmed b. Ömer ve Ahmed b. Mustafa nâm kimesneler şehâdetleriyle şer‘an sâbit olan Yusuf Bey b. Bünyad nâm kimesne meclis-i şer‘-i şerîfde müvekkil-i mûmâ-ileyhin tevâbi‘inden Ahmed b. Ali nâm kimesne mahzarında üzerine da‘vâ ve takrîr-i kelâm edip mezbûr Ahmed târih-i kitâbdan iki gün mukaddem müvekkil-i mûmâ-ileyhin abd-i memlûkü olan işbu orta boylu, açık kaşlı, gök gözlü, Rûsiyyü’l-asl Yuvan v. Kosta’nın taş ile amden ağzına vurup dört ön dişlerini ihrâc etmişdir suâl olunup ihkāk-ı hak olunmak matlûbumdur dedikde, gıbbe’s-suâl mezbûr Ahmed müvekkil-i mezbûrun abd-i memlûkü olan mevsûf-ı mezbûrun vech-i mübeyyen üzre ağzına taş ile vurup dört ön dişlerini ihrâc ettiğini tâyi‘an ikrâr etmeğin mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Abdi Çelebi b. Hüseyin, Şükrullah Bey b. Mustafa, Hasan Çelebi b. Ahmed, Edhem Çelebi b. Mehmed.