Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 299 Hüküm no: 306 Orijinal metin no: [67b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rus asıllı kölenin vasiyet yoluyla âzat edildiği İşbu sahîh ve şer‘î bir hüccettir. Mahmiye-i Kostantıniyye mahallâtından Gül Câmi‘i mahallesi sükkânından olan udûlden Cafer b. Hayreddin ve Ahmed b. Abdullah nâm kimesneler ve yine mahalle-i mezbûre ahâlîsinden Pandeli v. Yorgi, Dimitri v. Nikola, İstefani v. Petro, İspandoni v. Apostol ve Mano v. İstavroz nâm zimmîler meclis-i şer‘-i şerîf ve mahfil-i dîn-i münîfde -el-masûn ani’t-tağyîr ve’t-tahrîf hâzırûn olup âti’z-zikr vesâyeten hâsım olan kimesne mahzarında, hâmil-i hâze’l-kitâb Yorgaki v. Andriye ve Niko’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki mahalle-i mezbûrede mütemekkin iken bundan akdem mürd olan Nasrâni kimesne maraz-ı mevte yakalanıp başını ölüm yastığına koyduğunda rıkkını mu‘terif olan ve hâlâ hâlik-i mezbûrun oğlunun hizmetinde bulunan Akdeniz’de vâki‘ Midilli cezîresinde sâkin olan açık kaşlı, şehlâ, gök gözlü Rûsiyyü’l-asl İstefani nâm zimmî abd-i memlûkini âzâd ve tahrîr etmiş ve müdde‘î-i mezbûr Yorgaki’yi de vasiyyetinin tenfîzine ve cezîre-i mezbûrede sâkin bulunan sagīr oğlunun umûrunun tesviyesine ve zabt-ı ahvâli ve hıfz-ı emvâline vasî nasb etmişdi hâlik-i mezbûr vasiyyeti üzre mürd oldu. Şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber oldu. O da vesâyet-i mezbûreyi kabûl edip hizmet-i lâzımesini edâyı ta‘ahhüd etti. Sonra hâkim, abd-i mezkûrun hâlik-i mezbûrun sülüs-i mâlından ıtkına hükm etti. Cerâ zâlike ve hurrire fi’l-yevmi’s-sâdis min Zilka‘deti’ş-şerîfe sene isneteyn ve seb‘în ve elf. Şuhûdü’l-hâl: Şeyh Alemüddin Efendi b. Süleyman Kasımpaşa câmi‘i imâmı, Kadı Mustafa Efendi, Musli Bey b. Abdullah, Receb Kethüdâ ve gayruhüm mine’l-hâzırîn