Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 299 Hüküm no: 307 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sütçü Avyori ve Dimo v. Petro’nun çoban Garoyo v. Dimyani’den süt almak üzre yaptıkları anlaşmada Garoyo’nun haksız talebinin reddi Lebbân tâifesinden işbu hâmileyi’l-vesîka Avyori ve şerîki Dimo veledey Petro nâm zimmîler mahfil-i kazâda çoban tâifesinden Garoyo v. Dimyani nâm …? Bulgar zimmî muvâcehesinde her biri takrîr-i kelâm edip târih-i kitâbdan iki ay mukaddem mesfûr Garoyo âhardan iki yüz yetmiş re’s sağmal koyun iştirâ ve kabz eylediğinde biz dahi zikr olunan koyunlardan hâsıl olan sütü si‘r-i cârî üzre bize tahte’l-hesâb bey‘ etmek üzre merkūm Garoyo yedine on bin fıddî nakd-i râyic fi’l-vakt akçe def‘ ve teslîm eylediğimizde ol dahi vech-i muharrer üzre meblağ-ı mezbûru yedimizden alıp kabz edip meblağ-ı mezbûr tamâm olunca bize tahte’l-hesâb süt bey‘ ve teslîm biz dahi iştirâ ve kabz edip meblağ-ı mezbûr tamâm oldukda mezbûrdan akçemiz ile süt almak murâd eylediğimizde benim çobanlara deynim vardır peşîn akçe verirseniz size sütü veririm ve illâ âhara bey‘ ederim deyip bizim dahi peşîn akçe vermeğe iktidârımız olmamağla merkūm Garoyo bir hafta evvel koyunlardan hâsıl olan sütü âhar kimesneye bey‘ ve teslîm etmişiken hâlâ ol kimesne benim sütümü almaz elbette siz bana ol koyunları iştirâ ile sütünü biz alırız demişdiniz sütümü alın deyû dâimâ bizi rencîdeden hâlî değildir, suâl olunup takrîri tahrîr ve bizi bî-vech rencîdeden men‘ olunmak matlûbumuzdur dediklerinde gıbbe’s-suâl merkūm Garoyo cevâbında fi’l-hakīka hâl merkūmân Avyori ve Dimo’nun takrîr eyledikleri minvâl üzre olmuşdur gerçi sâlifü’z-zikr on bin akçeyi mezbûrân ile hesâblaşdım lâkin ikrâr ve va‘deleri üzre sütümü alsınlar deyicek bu makūle bey‘ ü şirâ câiz ve meşrû‘ olmamağın min ba‘d mezbûrân Avyori ve şerîki Dimo’yu ol vechile rencîde etmemek üzre mersûm Garoyo zimmîye tenbîh-i şer‘î birle mâ hüve’l-vâki‘ kayd şüd. Fi’l-yevmi’s-sâdis min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Ali Beşe Çukadâr, Hamza Efendi nâib-i recül, Mehmed Beşe Muhzır, Hüseyin Beşe Muhzır, Hasan Beşe Muhzır, Dilâver muhzır ve gayruhüm mine’l-hâzırîn.