Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 300 Hüküm no: 308 Orijinal metin no: [68a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi’nin kâtibi olduğu Kiremitçi Ahmed Çelebi Vakfı’na borcu olduğunun tespiti Havâss-ı Aliyye kazâsı a‘mâlinden kasaba-i Hasköy’de Kiremitçi Ahmed Çelebi merhûmun evkāfına meşrûtiyyet üzre bi’l-fi‘l mütevellî olan râfi‘ü’l-kitâb Mehmed Çavuş b. Ebûbekir mahfil-i kazâda yine merhûm-ı mezbûrun evlâdı evlâdının evlâdı evlâdından evkāf-ı mezbûrenin hâlâ kâtibi olan İmâm Mehmed Efendi b. Mustafa mahzarında üzerine bi’l-velâye takrîr-i da‘vâ edip kâtib-i mezbûr Mehmed Efendi bundan akdem ben diyâr-ı âharda iken evkāf-ı mezbûreden olup icâre-i mu‘accele ve müeccele-i ma‘lûmeteyn ile Sâlih Efendi tasarrufunda olan kiremithâne hissesini mezbûr Sâlih Efendi bilâ-veled fevt olmağla evkāf-ı mezbûre câbîsi gāib ani’l-meclis Ramazan Bey ile sâbıkan kethüdâ bey olan Süleyman Paşa’ya icâre-i müeccele-i ma‘lûme ve iki yüz elli bin akçe icâre-i mu‘accele ile îcâr ve meblağ-ı mezbûru vakıf için kabz eylediklerinden sonra meblağ-ı mezbûr[un] otuz sekiz bin iki yüz elli akçesini mezbûr Mehmed Efendi fuzûlen ahz ü kabz ve kendi mesârifine sarf ile istihlâk etmeğin sene ihdâ ve seb‘în ve elf Şevvâlü’l-mükerremi evâsıtında zikr olunan otuz sekiz bin iki yüz elli akçeyi mezbûr Mehmed Efendi’den tevliyyetim hasebiyle vakf-ı mezbûr için taleb [ve] da‘vâ ve huzûr-ı hâkimde mürâfa‘a-i şer‘-i şerîf olduğumuzda, mezbûr Mehmed Efendi meblağ-ı mezbûrun on beş bin akçesini ücret-i kitâbet deyû ve on yedi bin akçesini galle-i vakf-ı mezbûrun mesârif-i mu‘ayyeneden fazlası evlâda meşrûta olmağın ben dahi evlâddanım deyû ve iki bin yedi yüz elli akçesini kızım Ayşe dahi evlâddandır deyû ve üç bin beş yüz akçesini vakfda izn-i mütevellî ile harcım vardır deyû cem‘an otuz sekiz bin iki yüz elli akçe mâl-ı vakfı alıp kabz eylemişimdir deyû ikrâr edip ikrârı sicil ve hüccet olunmuşken, hâlâ meblağ-ı mezbûru teslîmden imtinâ‘ eder deyû târih-i mezbûr ile müverrah ve târih-i mezbûrda medîne-i Ebâ Eyyûb el-Ensârî’de nâibü’ş-şer‘ olan Yusuf Efendi imzâsıyla mümzâ ve hatmiyle mahtûm min külli’l-vücûh takrîrine mutâbık ve müdde‘âsını nâtık hüccet-i şer‘iyye ibrâz ve alâ vechi’l-hasm feth ve kırâat olunup istintâk olundukda, mezbûr Mehmed Efendi mazmûn-ı hüccet-i mezkûreyi ikrâr etmeğin vâkıf-ı mezbûrun batında merkūm Mehmed Efendi’den mukaddem evlâdı olmağla ber mûceb-i vakfiye-i ma‘mûlün-bihâ mezbûr Mehmed Efendi hisseye dâhil olmadığından mâ‘adâ ücret-i kitâbet deyû ve kızı mezbûre için dahi mâl-ı vakfdan akçe almak meşrû‘ olmamağla alâ mûcebi ikrârihî meblağ-ı mezbûrun izn-i mütevellî ile vakfa eylediği harcdan mâ‘adâ otuz dört bin yedi yüz elli akçe mâl-ı vakfı mütevellî-i mezbûr vakıf için edâ ve teslîm ile kâtib-i merkūm Mehmed Efendi ilzâm olundukdan sonra mütevellîsi izniyle vakf-ı mezbûra üç bin beş yüz akçe harc ve sarf eylediğini beyâna tenbîh birle mâ hüve’l-vâki‘ bi’t-taleb ketb olundu. Fî gurreti Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: es-Seyyid Ahmed Efendi b. es-Seyyid Hasan, Mustafa Ağa b. Sinan, Abdülbâkī Çelebi b. Ahmed el-Müezzin, Hasan Ağa b. Hızır seroda-i sâbık, Ali Çelebi b. Mehmed, Mehmed Bey b. Ebûbekir, Mehmed Çelebi b. Ömer el-Cündî, es-Seyyid Mehmed Çelebi [b.] es-Seyyid Mustafa, Mustafa Beşe b. Abdullah, Ali Beşe Çukadâr ve gayruhüm mine’l-hâzırîn.