Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 301 Hüküm no: 309 Orijinal metin no: [68a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çoban Dimo v. Mihal’in koyun satışından dolayı Yuvan v. Angeli’de alacağı olduğu Çoban tâifesinden işbu râfi‘ü’s-sifr Dimo v. Mihal nâm zimmî meclis-i şer‘-i hatîr-i lâzımü’t-tevkīrde yine tâife-i mezbûreden Yuvan v. Angeli nâm zimmî muvâcehesinde üzerine takrîr-i da‘vâ edip mezbûr Yuvan zimmîye her bir re’si yüz kırk ikişer akçeye olmak üzre yirmi re’s mülk koyunumu târih-i kitâbdan bir sene mukaddem iki bin sekiz yüz kırk akçeye bey‘ ve teslîm edip ol dahi minvâl-i muharrer üzre iştirâ ve tesellüm ve kabz ve kabûl eyleyip semeni meblağ-ı mezbûr iki bin sekiz yüz kırk akçe hakkımı hâlâ merkūm Yuvan’dan taleb eylediğimde teslîmden imtinâ‘ eder suâl olunup alıverilmek matlûbumdur deyicek gıbbe’s-suâl merkūm Yuvan cevâbında fi’l-hakīka müdde‘î-i merkūm Dimo’ya yirmi re’s koyun semeninden minvâl-i meşrûh üzre zimmetimde iki bin sekiz yüz kırk akçe lâzımü’l-edâ ve vâcibü’l-kazâ deynim vardır deyû bi tav‘ihî ikrâr ve i‘tirâf etmeğin ikrârı mûcebince meblağ-ı mârrü’z-zikr iki bin sekiz yüz kırk akçeyi müdde‘î-i mezbûr Dimo’ya edâ ve teslîme merkūm Yuvan ilzâm olunup mâ cerâ bi’l-ibtigā sebt olundu. Fi’l-yevmi’s-sâbi‘ min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Hamza Efendi nâib-i Râcil, Kethüdâ Receb Bey, Ali Beşe Çukadâr, Dilâver Muhzır, Hüseyin muhzır ve gayruhüm mine’l-hâzırîn.