Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 306 Hüküm no: 314 Orijinal metin no: [69b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ahmed Çavuş’un ölmeden önce câriyesi Kâtibe’yi âzat ettiği Tahakkuk-ı özr-i şer‘î ile husûs-ı âti’z-zikrin mahallinde tahrîri iltimâs olunmağın küttâb-ı mahkeme-i şerîfeden mevlânâ Sâlih Mehmed Efendi b. Mehmed irsâl olunup ol dahi zeyl-i vesîkada muharrerü’l-esâmî müslimîn ile Havâss-ı Aliyye kazâsı aktâ‘ından Hasköy’de Pîrî Paşa semtinde sâkine iken bundan akdem vefât eden Fâtıma Hâtun bt. Ahmed Çavuş’un verâseti, zevci kıdvetü’l-emâcid ve’l-ekârim hamlacı Mehmed Ağa b. Abdülmennân ile sadriye kebîre kızı umdetü’l-muhadderât zahrü’l-muvakkarât Ayşe Hâtun bt. Mehmed’e münhasıra olduğu şer‘an zâhir ve müte‘ayyin oldukdan sonra mezbûr Mehmed Ağa asâleten ve mûmâ-ileyhâ Ayşe Hâtun’un zevci ve tarafından her husûsuna ve ale’l-husûs ıtk-ı câ’i’z-zikri ikrâra vekîl olup vekâleti hasm-ı şer‘-i câhid mahzarında tescîl olan umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam Ali Efendi b. el-Hâc Hüdâverdi meclis-i ma‘kūd-ı mezkûrda müteveffât-ı mezbûreye rıkk-ı sâbıkını mu‘terife uzun boylu sarı kaşlı kara gözlü Rûsiyyetü’l-asl hâfızatü’l-vesîka Kâtibe bt. Abdullah mahzarında her biri bi’l-asâle ve bi’l-vekâle ikrâr ve takrîr-i kelâm edip ıtk-ı rakabât a‘zam-ı kurebât ve sebeb-i ref‘-i derecât vesîle-i duhûl-i cennât-ı âliyât olmağın müteveffât-ı mezbûre maraz-ı mevt ile marîza olduğu hâlde câriye-i memlûkesi mevsûfe-i mezbûreyi hasbeten lillâhi ve haseneten li rûhi resûlillah malından âzâd ve muzîk-ı rıkkıyyetden kazâ-i hürriyete idhâl edip üzerinde hakk-ı velâdan gayrı hakkım kalmadı sâir harâir-i asliyyât gibi hürre oldu dedikden sonra fevt olmağla mevsûfe-i mezkûre sülüs mâl-ı müteveffât-ı mezbûrdan âzâd olup hâlâ muhallefât-ı müteveffât-ı mûmâ-ileyhâyı alâ mâ farazallâhu te‘âlâ beynimizde taksîm eylediğimizde müteveffât-ı mezbûrenin bâliğan mâ belağa kıymetine vefâ etmeğin câriye-i mezbûrede kat‘an alâka ve medhalim kalmamışdır. Min ba‘d mezbûre Kâtibe sâir harâir-i asliyyât gibi hürre olmuşdur dediklerinde vâki‘ü’l-hâli mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin işbu kitâb-ı anberin-nikābı tevkī‘-i müstetâbı ile şeref-yâb eden hâkim-i âdil-i bî-mu‘âdil hazretleri kıbelinden sıhhat-i ıtk-ı mezkûra hüküm birle mâ hüve’l-vâki‘ kayd şüd. Li seneti isneteyn ve seb‘în ve elf. Şuhûdü’l-hâl: Mehmed Ağa b. Pîrî, Bayram Ağa b. Ali, Hüseyin Efendi b. Ahmed, es-Seyyid Bayram Ağa b. es-Seyyid Abdurrahman, Sinan Ağa b. Hasan ve gayruhüm mine’l-hâzırîn.