Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 310 Hüküm no: 319 Orijinal metin no: [70b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Receb’in menzilini Defterdar Mustafa Efendi Vakfı’na bey‘ bi’l-istiğlâl yoluyla satması Medîne-i Hazret-i Ebâ Eyyûb-i Ensârî -[dâme] fî rıdvâni’l-Bârî-’de vâki‘ Takyecibaşı mahallesi sâkinlerinden Ali Beşe b. Receb nâm kimesne meclis-i şer‘-i şerî‘at-ı şerîfede Defterdâr Mustafa Efendi vakf eylediği nukūda bi’l-fi‘l mütevellî olan râfi‘ü’l-kitâb Mustafa Çelebi b. Hüdâverdi mahzarında ikrâr ve takrîr-i kelâm edip emlâkimden olup mahalle-i mezbûrede vâki‘ etrâf-ı erba‘ası Ali Çelebi mülkü ve tarîk-i âm ile mahdûd ve mümtâz olan mülk menzilimi cümle tevâbi‘ ve levâhıkı ile mütevellî-i mûmâ-ileyh Mustafa Çelebi’ye alâ tarîki’l-istiğlâl altı aded sikke-i hasene-i şerîfe altın ile bir frengî altın ve seksen hurda akçeye bey‘ ve teslîm eylediğimde ol dahi minvâl-i muharrer üzre iştirâ ve tesellüm ve kabz ve kabûl eyleyip semeni olan mezbûrü’n-na‘t altı şerîfi altın ile bir frengî altın ve seksen hurda akçeyi mütevellî-i mûmâ-ileyh yedinden tamamen alıp kabz eylediğimden sonra yine menzil-i mahdûd-ı mezkûru mütevellî-i mûmâ-ileyh Mustafa Çelebi târih-i kitâbdan bir sene tamâmına değin ba‘de’t-tahliyyeti’ş-şer‘iyye üç yüz akçe ücret ile bana îcâr ve teslîm edip ben dahi minvâl-i mübeyyen üzre istîcâr ve tesellüm ve kabz ve kabûl eyledim deyicek gıbbe’t-tasdîki’ş-şer‘iyyi’l-vicâhiyyi’l-mu‘teber mâ hüve’l-vâki‘ kayd şüd. Fi’l-yevmi’l-âşir min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Ali Çelebi el-Kâtib-i vakf, Ahmed Çelebi b. Ali, Mehmed Çelebi b. Ahmed, Mahmud Çelebi el-Câbî, Mustafa Çelebi el-Kâtib-i vakf ve gayruhüm mine’l-hâzırîn.