Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 311 Hüküm no: 320 Orijinal metin no: [70b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Huri bt. Mehmed’in bazı eşyalarını Receb Efendi b. Yusuf’a hibe etmesi ve kendisini vasî tayin etmesi [Derkenar:] (…) hibe sûretidir. Medîne-i Hazret-i Ebâ Eyyûb-i Ensârî -dâme fî rıdvâni’l-Bârî-’de Takyecibaşı mahallesinde sâkine Şerife Huri bt. Mehmed nâm hâtun meclis-i şer‘de yine mahalle-i mezbûre imâmı ibn-i uhrevîsi işbu râfi‘ü’l-kitâb Receb Efendi b. Yusuf nâm kimesne mahzarında ikrâr ve takrîr-i kelâm edip hibe-i âtiyetü’z-zikrin sudûruna değin silk-i mülk-i sahîhimde münselik olan emlâkimden bir beledî döşek altı aded yastık kılıfı ve iki tencere-i vasat ve bir alaca kilim ve bir köhne yan keçesi ve iki ayaklı sandık ve üç aded sagīr sahan ve iki yemeni yorgan çarşafleriyle ve bir gayr-ı müsta‘mel çarşafimi ve sâir ism-i mâl ıtlâk olunur hırdavatımı ibn-i uhrevîm mezbûr Receb Efendi’ye hibe-i sahîha-i şer‘iyye ile hibe ve temlîk ve teslîm eylediğimde ol dahi meclis-i hibede ittihâb ve her birini tesellüm ve kabz ve kabûl eyleyip ve kemâl-i kereminden beni fevt oluncaya infâk ve iksâ etmeğe ta‘ahhüd eyledi ba‘de’l-yevm zikr olunan eşyâ ve sâir hırdavatım ibn-i uhrevîm merkūm Receb Efendi’nin emlâk-i mevhûbesidir, keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber yine mezbûre Şerife Huri Hâtun meclis-i mezbûrda cemî‘-i tasarrufât-ı şer‘iyyesi nâfize olduğu hâlde ikrâr-ı sahîh-i şer‘î kılıp küllü nefsin zâ’ikatü’l-mevt nass-ı şerîfi üzre bi emrillâhii te‘âlâ ben işbu dâr-ı dünyâdan sarây-ı ukbâya intikāl eylediğimde hâlâ silk-i mülk-i sahîhimde münselik olan kefenim ile beni tekfîn olunup kefenim içinde mevcûd iki sikke-i hasene-i şerîfi ve üç aded riyâlî kebîr guruş ve eyâdî-i nâsda olan bin akçemi iskāt-ı salâtıma ve min gayrı taksîr ve ta‘yîn techîz ve tekfîn ve eyyâm-ı mu‘tâdda tabh-ı ta‘âm ve sâir vücûh-ı hayrâta harc ve sarf olunmak vasiyyetim olup tenfîz-i vesâyâ-yı mezkûrum için ibn-i uhrevîm merkūm Receb Efendi’yi vasiyy-i muhtâr nasb ve ta‘yîn eyledim deyicek ol dahi vesâyet-i mezbûreyi kabûl ve hıdemât-ı lâzımesini edâya müte‘ahhid olmağın mâ cerâ bi’t-taleb kayd şüd. Fi’l-yevmi’s-sâbi‘ min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Mehmed Çelebi b. Abdülaziz el-Müezzin, Yusuf Bey b. Abdullah, mes[h]çi Ahmed Çelebi b. Ali, Mustafa Dede b. Maden, çorbacı Mehmed Bey b. Abdullah, Mehmed Çelebi b. İbrahim, Kenan Bey b. Abdullah, Receb Kethüdâ b. ( ) ve gayruhüm mine’l-hâzırîn.