Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 312 Hüküm no: 321 Orijinal metin no: [70b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiranora bt. Kostanti’nin evini Tanaş v. Papa Kaloyani’ye satması Mahrûse-i Galata’da Papa Nikola mahallesi sâkinelerinden Kiranora bt. Kostanti tarafından bey‘-i âti’z-zikri ve kabz-ı semeni ikrâra vekîl olup Kovraki? v. Yorgi ve Yorgi v. Makoyoni? şehâdetleriyle şer‘an vekâleti sâbite olan Kodomi v. Todori nâm zimmî vekîl meclis-i şer‘de işbu râfi‘ü’l-vesîka Tanaş v. Papa Kaloyani muvâcehesinde bi’l-vekâle ikrâr edip akd-i âtî sudûruna değin müvekkilem mezbûrenin silk-i mülk-i sahîhinde münselik olan emlâkinden Havâss-ı Aliyye kazâsına tâbi‘ kasaba-i Midye’de Polderomo mahallesinde vâki‘ bir tarafdan İstefani mülkü ve bir tarafdan Kolami mülkü ve bir tarafdan Kostanti mülkü ve bir tarafdan tarîk-i âm mâbeyninde olan uçurum ile mahdûd iki fevkānî oda ve tahtında ahır ve uçurum kurbunda zât-ı eşcâr-ı müsmireyi müştemil mülk menzilimi bi cümleti’t-tevâbi‘ ve’l-levâhık dört bin üç yüz fıddî nakd-i râyic fi’l-vakt akçeye müvekkilem mezbûre mesfûr Tanaş’a tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi [vech-i] muharrer üzre iştirâ ve tesellüm ve kabz ve kabûl ve semeni olan mezbûrü’n-na‘t dört bin üç yüz akçeyi tamamen müşterî-i mezbûr yedinden alıp kabz edip menzil-i mahdûd-ı mezkûrda vechen mine’l-vücûh alâkam kalmadı müşterî-i mezbûrun mülk-i müşterâsıdır, keyfe mâ yeşâ’ mutasarrıf olsun dedi dedikde gıbbe’t-tasdîk mâ cerâ kayd şüd. Fî 12 min Zilka‘de sene 1082. Şuhûdü’l-hâl: Hüseyin b. Hasan, Mehmed b. Mahmud, Ahmed Bey Kethüdâ, Mehmed Çelebi b. Musli, Hasan Efendi Ser-muhzır, Kostanti b. Hristo, Kosteri v. Oserino, Anderon v. Kosti, Dimitraki v. Anastaş, Menkoyoli v. Koloyani, Aleksi v. Todori, Angili v. Mavridi.