Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 313 Hüküm no: 322 Orijinal metin no: [71a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in oğlu Mahmud’un borcunu taksitle ödemeyi üstlendiği Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Câmi‘-i Kebîr mahallesi sâkinelerinden Fâtıma bt. Mehmed nâm hâtun mahfil-i kazâda işbu râfi‘ü’l-kitâb fahrü’l-emâsil ve’l-a‘yân İbrahim Ağa b. Receb nâm çorbacı mahzarında bi’t-tav‘ ve’r-rızâ ikrâr ve takrîr-i kelâm edip sadrî kebîr oğlu hâzır bi’l-meclis Mahmud Ağa b. Hızır bundan akdem mezkûr İbrahim Ağa’dan kırk bin nakd-i râyic fi’l-vakt akçe istikrâz ve kabz eylediğinden mâ‘adâ yine oğlum mezbûrun bundan esbak fevt olan Cafer Çelebi nâm kimesneye zimmetinde lâzımü’l-edâ on bin akçe deynini edâya ümm-i kefîli olmağın merkūm Cafer Çelebi meblağ-ı mezbûru hâl-i hayâtında kefîl-i merkūm İbrahim Ağa’dan taleb ve ahz etmeğin oğlum mezbûr Mahmud Ağa’nın merkūm İbrahim Ağa’ya zimmetinde lâzımü’l-edâ elli bin akçe deyni olup mârrü’z-zikr elli bin akçe hakkını mezbûr İbrahim Ağa bundan akdem oğlum mezbûrdan taleb ve da‘vâ edip oğlum mezbûr Mahmud Ağa’nın meblağ-ı mezbûru edâya iktidârı olmamağla süknâsı bana meşrûta mahalle-i mezbûrede vâki‘ lede’l-ahâlî ma‘lûmetü’l-hudûd vakıf menzili mülkü olmak üzre mezkûr İbrahim Ağa’ya alâ tarîki’l-istiğlâl elli bin akçeye bey‘ ve teslîm, ol dahi tarîk-i mezbûr üzre iştirâ ve ba‘de’t-tahliyye ücret-i ma‘lûme ile sene tamâmına değin yine oğlum mezbûra îcâr, ol dahi istîcâr edip ben dahi oğlum mezbûrun hâtırı için menzil-i mezbûrun vakfiyyetini ketm ve mârrü’z-zikr elli bin akçeyi dâyin-i mezbûra edâ ve teslîme emr ve kabûlü hâvî kefâlet-i sahîha ile kefîl olmuşdum el-hâletü hâzihî havfen mina’llahi menzil-i mezbûrun vakfiyyetini işâ‘at ve vakfiyesini ihrâc eylediğimde ol istiğlâlin ameli bâtıl olmağın mezkûr İbrahim Ağa sâlifü’z-zikr elli bin akçeden benim oğlum mezbûrun yedinden bi’d-defe‘ât dört bin akçesini ve menzil-i mezbûr kirâsından kirâcılar yedinden iki bin akçe ki cem‘an altı bin akçesini kabz mâ‘adâ kırk dört bin akçeyi benden kefâletim hasebiyle taleb eylediğinde benim dahi def‘aten edâya kudretim olmamağla on bin akçesini târih-i kitâbdan on gün tamâmında ve mâ‘adâ otuz dört bin akçesini dahi üç yüz altmış gün tamâmında edâ etmek üzre te’cîle tâlibe olduğumda, mezbûr dahi ber minvâl-i muharrer te’cîl eylemişdir suâl olunsun deyicek gıbbe’s-suâl mezbûr İbrahim Ağa cevâbında fi’l-hakīka hâl minvâl-i [muharrer] üzre olmuşdur deyû mukırra-i mezbûreyi tasdîk ve lâkin mezbûrenin ve oğlu medyûn-ı mezbûrun nefislerine ve hîn-i mütâlebede meclis-i şer‘a ihzârlarına kefîl taleb etmeğin mezbûr Mahmud Ağa dahi meclis-i mezbûra fi’l-vâki‘ dâyin-i mezbûra bâlâda tahrîr olunduğu üzre ba‘de’l-hesâb kırk dört bin akçe zimmetimde lâzımü’l-edâ deynim vardır deyû ba‘de’l-ikrâr dâmâdı Mehmed Çelebi b. Yusuf meclis-i mezbûrda mezbûre Fâtıma’nın ve oğlu merkūm Mahmud Ağa’nın nefislerine ve hîn-i mütâlebede meclis-i şer‘a ihzârlarına emirleriyle kefîl olmağın ba‘de’l-kabûl mâ cerâ kayd şüd. Fî 2 Zilka‘de sene [10]72. Şuhûdü’l-hâl: Ahmed Efendi el-Müderris, el-Hâc Murad Bey Bevvâb-ı sultânî, Mehmed Çelebi b. Musli, Mustafa Bey b. Sâlih, Mehmed Çelebi b. Abdullah, Hüseyin Muhzır, Receb Kethüdâ, Şaban Bey b. ( ) ve gayruhüm.