Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 314 Hüküm no: 323 Orijinal metin no: [71a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Abdülbâki Çelebi’nin boşandığı eşinden olan oğlu Seyyid Abdullah’a nafaka tayini Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Çavuş Kasım câmi‘-i şerîfi’nde hâlâ imâm olan fahrü’l-eimme Şerîfezâde Hüseyin Efendi’nin sulbî kebîr oğlu Abdülbâkī Çelebi nâm seyyid meclis-i şer‘-i şerîfde takrîr-i kelâm ve ta‘bîr ani’l-merâm edip bundan akdem zevcem olup beynimizde hüsn-i zindegâne olmamağla beynimiz[de] talâk vâki‘ olan ( ) bt. Şerife Ahmed Efendi benim firâşımdan hâsıl edip hâlâ tevellüd eylediği es-Seyyid Abdullah nâm sagīr oğlumun nafaka ve kisvesi için benim keyfiyyet-i ahvâlime vukūf ve şu‘ûru olan bî-garaz müslümanlardan istihbâr olunup malımdan kadr-i ma‘rûf nafaka farz u takdîr olunmak matlûbumdur deyicek zeyl-i kitâbda muharrerü’l-esâmî olan bî-garaz müslimîn merkūm es-Seyyid Abdülbâkī Çelebi’nin külle yevm on yedi akçe vazîfesi olup ol vazîfeden gayrı bir akçe ve bir habbe kâr u kisbi olmadığını meclis-i şer‘de haber verdiklerinde hâkim-i muvakki‘-i sadr-ı kitâb tûbâ-lehû hüsnü me’âb hazretleri dahi sagīr-i mezbûrun nafaka ve kisvesi ve sâir havâic-i zarûriyyesi için târih-i kitâbdan beher yevm beşer akçe babası mezbûr es-Seyyid Abdülbâkī Çelebi üzerine nafaka farz ve takdîr edip zikr olunan yevmî beşer akçeyi sagīr-i mezbûrun vâlidesi olan zevce-i mutallakası mezbûreye edâ ve teslîme mezbûr es-Seyyid Abdülbâkī Çelebi’ye tenbîh-i şer‘î birle mâ cerâ kayd şüd. Fi’l-yevmi’r-râbi‘ aşer min Zilka‘deti’ş-şerîfe li seneti isneteyn ve seb‘în ve elf. Şuhûdü’l-hâl: Muslihiddin Efendi b. İlyas, Mehmed Çelebi b. Hasan Dede, Ali Çelebi b. Osman, Süleyman Bey b. Abdullah, Hüseyin Muhzır ve gayruhüm mine’l-hâzırîn.